“Оюутолгой” компанийн ТУЗ-д Монголын талыг төлөөлж буй ТУЗ-ийн гурван гишүүний нэгийг чөлөөлөх тухай яриа долоо хоногийн өмнөөс гарсан билээ. Одоо ТУЗ-д сууж байгаа гурван гишүүн нь Ерөнхийлөгч асан Н.Багабанди, Нийслэлийн Засаг даргын орлогч асан Б.Мөнхбаатар, Монгол-Германы Ашигт Малтмал Технологийн Их сургуулийн гүйцэтгэх  захирлаар ажиллаж  байсан Ч.Алтаннар, Н.Багабандийн хувьд ТУЗ-д хоёр дахиа томилогдон сууж байгаа бол Ч.Алтаннар, Б.Мөнхбаатарын хувьд 2016 онд шинээр томилогдмон билээ. Энэ гурвын хэнийг нь ТУЗ-өөс чөлөөлж, оронд нь хэнийг томилох бол гэдэг хүлээлт үүсээд долоо хоног өнгөрөв. Гэвч сүүлд авсан мэдээллээр ТУЗ-ийн гишүүн Ч.Алтаннар өөрийн хүсэлтээр чөлөөлөгдөх өргөдлөө өгсөн гэнэ.  

Хэрэв түүний хүсэлтийг хүлээж авбал Засгийн газар орных нь хүнийг томилох хэрэгтэй болно. Оюутолгойн ТУЗ-д шинээр томилогдох эрхэм “Эрдэнэс Монгол” компанийн гүйцэтгэх захирал Ц.Түмэнцогт байж болох тухай ч хэвлэлүүдээр гараад байгаа. Түүнийг өнгөрсөн долоо хоногт үүрэгт ажлаас нь чөлөөлж, оронд нь Эрчим хүчний сайд асан П.Ганхүүг томилсон юм. Харин Ч.Алтаннарын хувьд УИХ-ын гишүүн, “Монполимет”-ийн гэх Ц.Гарамжавын хүргэн.

Ч.Алтаннар нь 2016 оны есдүгээр сард “Оюутолгой” ХХК-ийн ТУЗ-ийн гишүүнээр томилогдсон. МУИС-ийн Бизнесийн Сургуулийн санхүүгийн дэд профессор. Өмнө нь АНУ-ын Флоридагийн Их сургуульд туслах профессор, Их Британийн Империал Коллеж Лондонд эрдэм шинжилгээний ажилтнаар, Оюутолгой ХХК-нд бизнесийн ахлах шинжээч, Монгол-Германы Ашигт Малтмал Технологийн Их Сургуулийн гүйцэтгэх захирлаар ажиллаж байсан тухай “Оюутолгой” компанийн танилцуулгад бичсэн байна.

Б.ТУЯА