УИХ-ын нэгдсэн чуулганаар “Хүүхдийн мөнгөн тэтгэмжийн хамрах хүрээг нэмэгдүүлэх талаар авах арга хэмжээний тухай” болон “Монгол Улсын хүүхэд бүрд хүүхдийн мөнгөн тэтгэмж буюу “Хүүхдийн мөнгө” олгох тухай” УИХ-ын тогтоолын төслийн нэгтгэсэн хэлэлцүүлгийг хийх үеэр гишүүдийн дунд маргаан дэгдэв. “Хүүхдийн мөнгөн тэтгэмжийн хамрах хүрээг нэмэгдүүлэх талаар авах арга хэмжээний тухай” тогтоолын төслийг Засгийн газраас боловсрулсан бол “Хүүхэд бүрт хүүхдийн мөнгөн тэтгэмж олгох тухай” тогтоолын төслийг УИХ дахь АН-ын бүлгээс боловсруулсан байна.

Хэлэлцүүлгийн үеэр Сангийн сайд Ч.Хүрэлбаатар “Бид ОУВС-тай хийсэн гэрээгээр хүүхдийн мөнгийг нийт хүүхдийн 80 хувьд олгох зөвшилцөл хийсэн. Эдийн засаг хүндрэлтэй байгаа үед хүүхдийн мөнгийг 100 хувь олгох боломжгүй. Хэрвээ 100 хувь олгоход хүрвэл иргэдийн дунд санал асуулга явуулж шийдвэрлэнэ. Санал асуулгын үр дүнд үндэслэж ОУВС-тай дахин зөвшилцөж болох юм” гэснээс болж маргаан дэгдэв.

УИХ-ын гишүүн Ж.Мөнхбат “Санал асуулгад мөнгө үрэхийн оронд шууд 100 хувь олгох зөв. Ч.Хүрэлбаатар сайд та Богд уулын энгэрт хэдэн тэрбумын хауст амьдардаг байж хүүхдийн 20 мянган төгрөг дээр хязгаар тавих чинь ёс зүйгүй үйлдэл шүү” гэв.

Б.ЗАЯА