АТГ-ын дэргэдэх Олон нийтийн зөвлөлийн дарга Г.Баасан өнөөдөр Ерөнхий сайд асан С.Баярын асуудлаар хэвлэлийн бага хурал хийлээ. ОНЗ-өөс Улсын Ерөнхий прокурор М.Энх-Амгаланд тодорхой асуудлаар хүсэлт гаргасан байна. 

Ерөнхий сайд асан С.Баяр нь 2018 оны дөрөвдүгээр сарын 10-ны өдөр хорих 461-р ангид хоригдсон. Харин дөрөвдүгээр сарын 30-ны өдөр АТГ-ын ОНЗ-ийн дарга Г.Баасан тус хорих ангид очиж, хоригдож байгаа хүмүүсийн бүртгэлтэй танилцаад буцсаны дараа буюу тавдугаар сарын 3-ны өдөр АТГ-ын дарга Х.Энхжаргал С.Баярыг өрөөндөө дуудаж дарамталсан байх магадлалтай гэв.

Учир нь АТГ-аас мөрдөн байцаалт явуулах тохиолдолд байцаалт авах тусгай өрөөтэй. Гэтэл АТГ-ын дарга Х.Энхжаргал нь мөрдөн шалгах ажиллагааны хууль зөрчиж С.Баярыг өрөөндөө дуудсан, мөн уулзалтын үеэрх камерын бичлэгээ “мөрдөн шалгах ажиллагааны нууц” хэмээн үзүүлэхгүй байгаа зэргээс үзэхэд АТГ-ын дарга С.Баярыг дарамталсан байх магадлалтай гэв. Тиймээс энэ асуудлыг шалгуулахаар АТГ-ын ОНЗ-өөс Улсын Ерөнхий прокурорт хүсэлт гаргажээ.

Б.ГАЛ