“Тавантолгойг хөдөлгөхдөө АТГ-аас асуугаарай, Ерөнхий сайд аа...” Манайхан ч бас л хоржоонтой туучийнууд шүү. Гэхдээ бас оргүй ч юм биш л дээ. С.Баярцогтын өмгөөлөгч Г.Орхон “Шүүгч Оюутолгойн гэрээ хуульд нийцсэн эсэх, өөрчилж болох эсэхийг шинжээчдээс асууж байгаа нь өөрөө учир дутагдалтай” гэсэн байна лээ. Өөрөөр хэлбэл, С.Баярцогт, Ч.Сайханбилэг, С.Баяр нарыг албан тушаалын хэрэгт сэжиглэн барьж хорьсон хуулийн байгууллагууд маань одоо хэр нь яллах үндэслэлээ олоогүй л гэсэн үг. Арга мухардаад УИХ-аар баталсан Оюутолгойн хөрөнгө оруулалтын гэрээ “хуульд нийцсэн эсэхийг” шинжээчдээс асууж яваа юм биз дээ. Хүн нь байвал хэрэг нь олдоно гэдэг л болж байна.

Хэрэв шүүхээс томилсон шинжээчид нь “Хууль зөрчсөн байна” гэвэл Хөрөнгө оруулалтын гэрээг баталсан өмнөхийн өмнөх парламентыг яах юм бол? Оюутолгойн гэрээг дахин авч хэлэлцээд "Гэрээ байгуулсан хүмүүст хариуцлага тооцох үндэслэл алга" гэж дүгнэсэн өмнөх парламентыг бас яах вэ? Шинжээчид хэрэв “өөрчлөлт оруулж болно” гэчихвэл одоогийн парламент нь бас “гэрээгээ өөрчилнө” гэх үү? Онигооны ч хүүдий юмаа даа, манай хуулийнхан.

Ийм нөхцөлд Монгол Улсын Ерөнхий сайд “Монголын эдийн засгийн чуулган”-ыг зохион байгуулж, “Монголтой бизнес хийж болж байна. Бид хуулийн хүрээнд асуудлаа шийддэг, байгуулсан гэрээгээ биелүүлдэг” гэж хөрөнгө “хошгоруулж” (цаадуул нь тэгээд хошгортлоо ч өдий биз дээ) зогсох нь хувь заяаны шоглоом юм даа

Өчигдөр Ерөнхий сайд Тавантолгойн төслийг хэрхэн хөдөлгөх талаар Засгийн газраас боловсруулсан саналыг УИХ дахь намын бүлэгтээ танилцуулсан. Үндэсний үйлдвэрлэгчид буюу компаниудыг Тавантолгойн төсөлд татан оролцуулах, БНХАУ-тай хамтрах, эсвэл ордын 30 хувийг олон улсын зах зээлд гаргах зэрэг хувилбарууд багтаж байгаа юм гэнэ. МАН-ын бүлэг дээрх хувилбаруудтай танилцаад “ордын 30 хувийг олон улсын зах зээлд гаргах хувилбарыг судалж үзнэ” гэсэн байна лээ. Өөрөөр хэлбэл, гадаад зах зээл дээрээс хөрөнгө босгох хувилбарыг илүүд үзсэн байна. Гэхдээ төр өөрөө менежмэнтээ хийнэ.

Харин одоогийн нөхцөл байдалд хөрөнгө оруулагчид манай төрд хэр итгэл үзэмшилтэй хандах юм бол доо. Өчигдөр эхэлсэн Эдийн засгийн чуулганд лав Дэлхийн банкны нэг захирлаас өөр гаднын түнш байгаагүй. (тэр нь ганцхан үг хэлсэн, хөрөнгө оруулагчдаа хамгаалаарай гэж) Харин 21 аймгийн Засаг дарга нар анх удаагаа уригдсан байна лээ. Ерөнхий сайд нь “Улс төржихөө болиод хүчээ нэгтгэе” гэж хэмээн хоолойгоо шахахыг бодоход асуудал гадаад талд биш, дотооддоо бид асуудалтай байна гэдгийг ил, далд ч хүлээн зөвшөөрсөн хэрэг биз.

Гэвч одоо яадаг билээ, хуулийн байгууллагууд нь (мэдээж өөрсдийн санаачилгаар биш л дээ) хөдөлж байгаа ганц хоёр төслөө татаж унагаах ажлыг хэн нэгний оролцоотойгоор тасралтгүй үргэлжлүүлж байгаа нөхцөлд хэн Монголд итгэж хөрөнгөө эрсдэлд оруулах вэ? Өмнө нь хуулиа өөрчилж тоглодог байсан бол одоо хүнийг нь хорьж тоглодог болчихоод байна шүү дээ. Яаж ийж хулхидаад, хөрөнгө оруулагчдыг урхидаад ирлээ ч гэсэн шийдвэр гаргахдаа хүрвэл УИХ, Засгийн газар нь шийдвэр гаргах биш, АТГ, прокурор, шүүхийн шинжээчдээс асууж гэрээ хэлцлээ хийх ёстой болж байна. Тэгэхгүй бол хэн, хэзээ дээлээ нөмрөхийг хэн мэдлээ. Оюутолгойн ордыг эргэлтэд оруулсан хоёр Ерөнхий сайдаа, гэрээн дээр ажилласан Сангийн сайдаа бариад хорьчихсон улс шүү дээ.

Ийм байхад, хуулийн байгууллага нь ингэж ажиллаж байхад, хөрөнгө оруулагчдын өмнө хамаг хаалга үүдээ түгжчихээд “Манайд хөрөнгө оруулаарай. Хуулиа дагаж, гэрээгээ биелүүлдэг улс шүү” хэмээн тооноороо даллах Ерөнхий сайд маань хувь заяаны шоглоом юм даа. Анх У.Хүрэлсүхийг Ерөнхий сайдаар томилогдож байхад манай хэвлэлүүд “Манай Ерөнхий сайдыг мааш том сорилт хүлээж байна” хэмээн бичдэг байлаа л. Тэр сорилт нь харин одоо тоглоом шоглоомоор дуусч байх шиг.

Алдаа дутагдалтай ч Н.Алтанхуяг гэдэг хүн Ерөнхий сайд байхдаа маш олон асуудлыг тал талаас нь цуглуулаад нэг бодлого дээр авчирч зангидаж чаддаг хүн байж. Харин манай хүн (У.Хүрэлсүх) төвд нь суучихаад тал тал тийш нь цацаад байдаг. Хэзээ тэр бүхэн нь богцондоо багтаж, бодлого болж цэгцрэх юм, бүү мэд

Б.ЗАЯА