Гэрэл зургийг Монцамэ

МАН-ын залуу халаа, “шилэгдсэн кадр”, хурган дарга нарын хүн амь, зодоон цохион, танхай, хүчингийн хэргийн түүх дахин нэгээр нэмэгдэв. Энэ удаад МАН-ын бас нэг “томоотой” гишүүн “Тавантолгой төмөр зам” ХХК-ийн Гүйцэтгэх захирал Н.Удаанжаргал гэгч бусдын амь насанд халдахаар завдсан байна.

Уг хэрэг шинэ жилийн баярын өмнө болсон ч хуулийн байгууллагуудын хавтсанд үдээтэй өнөөдрийг хүрсэн байна. Хохирогч нь АН-ын ҮБХ-ны гишүүн, Сэлэнгэд нэр дэвших магадлалтай гэгдэж байгаа нэгэн. Олны нүд, чихэнд хүргэж болохгүй шалтгаан байсан учраас Г.Удаанжаргал хэргийг дарж өнгөрөөхийн тулд хамаг хүчээ дайчилсан бололтой.

Хохирогчийн нэрийг Н.Ганхөлөг гэх бөгөөд Н.Удаанжаргал “босс” Тавантолгойн ордод лиценз эзэмшдэг “Өсөх-Зоос” ХХК-ийн дэд захирал Б.Бумцэнд, Ц.Тулга нартай нийлж бүлэглэн зоджээ. Хохирогч амиа аврахын тулд тэдний гараас арай гэж мултарч хүмүүсийн дунд зугтаж очсоноор энэ хэрэг азаар амины гарзгүй өнгөрсөн байна. Зодоон эхлэх үед Н.Удаанжаргалыг дагаж явсан бас нэг залуу бичлэг хийж эхэлсэн бөгөөд хохирогч ч тэдний цаад зорилго, илт өдөөн хатгалгыг гадарласан учир эсэргүүцсэн ганц ч хөдөлгөөн хийлгүй зодуулсан байна.

Нэгэнт зодооны үеэр хохирогчийн эсрэг нотолгоо гаргаж авч чадаагүй учир өөрсдийн гар утсаараа хийсэн бичлэг болон гэмт хэрэг гарсан “Сөүл” рестораны камерын бичлэгийг бүгдийг устгасан аж. Хэргийн ул мөрийг баллах энэ үйлдэлд нь “Сөүл” рестораны эзэн, намын журмын нөхөр, хатагтай Д.Өнөрболор ч бас оролцсон бололтой.

Ийм нэгэн “жижигхэн” хэргийг цагдаагийнхан гурван сар шалгаж, прокурорт хянагдаж байна. Намын дарга нь дургүй нэгнээ дуртай газраа шанаадаж чаддаг, дагалдагч нар нь өрөөндөө архидаад нэгнийхээ аминд хүрдэг, аймгийн Засаг ноёны өрөөнд байнга болдог архидалтаас залуухан бүсгүй цогцос болоод гэртээ харьдаг ийм намд энэ зэргийн зодоон бол “жижиг” асуудал. Намынх нь нэр хүртэл “МАН-яак” болчихоод байхад тоож байгаа ч амьтан алга.

А.Чулуу