Баян-Өлгий аймгийн Онцгой комиссын өнөөдрийн хуралдаанаар коронавирусийн халдвараас урьдчилан сэргийлэх зорилгоор сар шинийн баярын өдрүүдэд тус аймагт болон сумдаас гарах, орох хөдөлгөөнийг түр хязгаарлахаар шийдвэрлэв.
Үүнтэй холбогдуулан аймгийн Засаг даргын 113 тоот захирамж гарч энэ сарын 23-ны 08:00 цагаас 27-ны 08:00 цаг хүртэл замын хөдөлгөөнийг түр зогсоохоор боллоо.
Гэхдээ ар гэрийн гачигдал, түргэн тусламж, албан томилолт зэрэг хүндэтгэн үзэх шалтгаанаар улс, хот хооронд болон орон нутагт зорчих төрийн албан хаагч, иргэдийг холбогдох нотлох баримтыг үндэслэн нэвтрүүлэх ажээ.
Иймд ард иргэдийг дээрх хугацаанд болзошгүй эрсдэлээс урьдчилан сэргийлж замд гарахгүй байхыг уриалав.
Мөн өчигдөр УОК-оос улс, хот хоорондын замын хөдөлгөөнийг ТҮР ХААХ шийдвэр гаргаад байгаа билээ.
Иймд иргэд та бүхэн цаг агаарын байдал болон хайртай гэр бүлээ эрдлээс хамгаалж онцын шаардлагагүй тохиолдолд хол замд зорчихгүй байхыг уриалж байна.
АНХААРУУЛГА: Цаг агаарын нөхцөл байдал хүнд үеэд ХУЛГАЙН ЗАМААР зорчиж, цасанд сууж, хамт яваа хүнээ болон өөрсдийгөө, эд хөрөнгө, амь насаараа хохирох аюултай нөхцөл байдлаас урдчилан сэргийлнэ үү.
Ийнхүү нийт НАЙМАН аймаг Цагаан сарын баярын өдрүүдээр иргэдийн болон автомашины хөдөлгөөнийг хязгаарлах шийдвэр гаргаад байна.
-
Увс аймгийн Онцгой комисс 2020.02.17-нд хуралдаж, хоёрдугаар сарын 17-26-ны өдрийг дуустал Улаангом сумаас гарах болон орох замын хөдөлгөөнийг хязгаарлав.
-
Дундговь аймгийн Онцгой комисс 2020.02.18-нд хуралдаж, хоёрдугаар сарын 21-27-ны өдрийг хүртэл аймаг, сумын төвөөс гарах, орох иргэд, автомашины хөдөлгөөнийг хязгаарлалаа.
-
Дорноговь аймгийн Сайншанд сумын Засаг дарга 2020.02.17-нд захирамж гаргаж, Хамарын хийд, Хан Баянзүрх хайрхан чиглэлийн тээврийн хэрэгслийн хөдөлгөөнийг гуравдугаар сарын 2-ны өдрийг дуустал хязгаарлахаар шийдвэрлэв.
-
Архангай аймгийн Засаг дарга 2020.02.18-нд захирамж гаргаж, аймаг, сумын төвөөс гарах, орох иргэд, автомашины хөдөлгөөнийг хоёрдугаар сарын 21-27-ны өдрийг дуусталх хугацаанд хязгаарлалаа.
-
Говь-Алтай аймгийн Онцгой комисс 2020.02.18-нд хуралдаж, хоёрдугаар сарын 21-27-ны өдрийг хүртэл аймаг, сумын төвөөс гарах, орох иргэд, автомашины хөдөлгөөнийг хязгаарлалаа.
-
Ховд аймгийн Засаг дарга 2020.02.18-нд захирамж гаргаж, 2020 оны хоёрдугаар сарын 21-26-ны өдрийг дуустал аймаг, сумын төвөөс гарах, орох иргэд, автомашины хөдөлгөөнийг хязгаарлав.
-
Сүхбаатар аймгийн Онцгой комисс 2020.02.20-нд хуралдаж, хоёрдугаар сарын 23-26-ны өдрийг дуустал 13 сумын чиглэлийн авто машины хөдөлгөөнийг хязгаарлав.
