Өнгөрсөн удаагийн Ерөнхийлөгчийн сонгуулиас хойш манай улс төрчдийн дунд нэг ийм үг "моод" болоод байна. Хулгайчийг хулгайчаар дарна гэх. "Женко ч хулгайч л даа. Гэхдээ М.Энхболд, Ц.Элбэгдоржийн бүлэглэлийг дарахын тулд Женко шиг хулгайч хэрэгтэй юм байна. Хулгайчийг хулгайч л дардаг юм байна..." Ингэж яриад Х.Баттулгыг төрийн тэргүүнд залсан. Одоо монголчууд дараачийнхаа "хулгайчид" хүчин зүтгэж байна. Дахиад дөрвөн жилийн дараа бас хаанаас ямар "хулгайчаа" залж, эднийгээ даруулах тухай ярьж явахыг таашгүй. 

Өчигдөр Төрийн ордонд улс төрийн 10 гаруй нам цуглаж, нэгэн "учир битүүлэг" арга хэмжээ зохион байгуулав. Өмнөх өдөр нь тус намууд ирэх сонгуульд нэгдэж оролцохоор тунхаг бичигт гарын үсэг зурна гэх зар тараасан намууд ЗГХЭГ-ын дарга Л.Оюун-Эрдэнийн боловсруулсан "Алсын хараа 2050" гэдэг баримт бичгийг нэг нэгээрээ тэвэрч зогсоод зургаа даруулаад тарцгаав. Уг нь бол 2020 оны сонгуулиар МАН ялагдвал хог болох цаас. Гэтэл УИХ-д суудалтай намын дарга нар уг баримт бичгийг УИХ-аар "батлуулахын төлөө ажиллана" гэж ам тангараг тавьжээ. Нийлж аваад "МАНАН-г дарцгаах" юм байх. 

Мөн өдөр ЕТГ-ын дарга З.Энхболд ажлаа хүлээлгэн өгч, намын болон сонгуулийн ажилдаа шуударч байгаагаа зарлав. Өөрийнх нь хийж буй улс төрийн акциуд Ерөнхийлөгч дээр хаяглагдаад байгаа учраас арга буюу ажлаа өгөхөөр болсон гэв. Ажлаа өгсөн төдийгөөр энэ хоёр хүний зам салчихна гэж юу л бол. Харин өнгөрөгч 2016 оны УИХ-ын сонгуульд намаа ялагдуулснаас хойш АН дотор алдагдсан орон зайгаа эргүүлж авахаар эргэж ирж байгаа нь бол тодорхой.

Ерөнхийдөө тус намын удирдах байгууллагад өөрийн хүмүүсийг байршуулах, дараачийн парламентад өөрсдийн /Х.Баттулга, З.Энхболд нарын/ төлөөний хүмүүсийг оруулж ирэх зорилготойгоор бууж ирсэн нь бол тодорхой. Эхнээсээ нам дотор орж ирээд байршчихсан, тусдаа маягтай үйл ажиллагаа явуулж байна гэх сураг сонсогдоод байгаа. С.Эрдэнэ шиг хүн зүв зүгээр сууж байгаад хаалга үүдээ нээгээд өгсөн гэдэг юу л бол. Үүнд хуулийн байгууллагынхныг оролцуулсан байх магадлалтай харагдаж байгаа.

Өнгөрөгч даваа гаригт шуугиулаад авсан НДС-гийн асуудал, АН-ын нөхдийг барьж хорьсон зэрэг явдал ч гэсэн С.Эрдэнэ лүү л харвасан "сум" байсан болов уу. АН-ынхан "МАН-аас явуулж буй улс төрийн акци" хэмээн мэдэгдсэн нь ч гэсэн үнэн хэрэгтээ АН-ын дотоодод бий болоод байгаа зөрчилдөөнөөс зугтах гэсэн тойруулал байж болох юм. 

Б.ЗАЯА