УИХ-ын гишүүн Д.Гантулгыг хүчингийн хэрэгтэй холбогдуулан шалгаж, УИХ-ын гишүүний бүрэн эрхийг нь түдгэлзүүлэх хүсэлтийг прокурорын байгууллагаас УИХ-д тавьсан. Гэвч УИХ-ын гишүүний бүрэн эрхийг түдгэлзүүлэх тухай хуулийн зохицуулалтыг Цэц хүчингүй болгосноос асуудлыг хэлэлцэх боломжгүй болсон билээ.

Үүний дараа УИХ-ын гишүүн Д.Лүндээжанцан санаачлан УИХ-ын тухай хуульд нэмэлт өөрчлөлт оруулах төслийг УИХ-аар хэлэлцүүлж, тавдугаар сарын 03-нд баталжээ. Хуулийн нэмэлт өөрчлөлтөөр УИХ-ын гишүүн гэмт хэрэгт холбогдож, бүрэн эхийг нь түдгэлзүүлэх саналыг прокурорын байгууллагаас тавьбал УИХ хэлэлцэн шийдвэрлэхээр заасан байна.

Нэг үгээр Д.Гантулга гишүүнийг бүрэн эрхийг хэлэлцэхэд үүссэн хуулийн мухардал арилсан учир асуудлыг дахин хэлэлцэх боломжтой болов.

УИХ-ын чуулганы хуралдааны дэгийн тухай хуульд зааснаар УИХ-ын баталсан хууль, бусад шийдвэрийн эцсийн найруулгыг УИХ-д танилцуулснаас хойш ажлын гурван өдөрт багтаан УИХ-ын дарга түүнд гарын үсэг зурж ёсчилдог. Ёсчилсон хууль болон УИХ-ын бусад шийдвэрийг УИХ-ын Тамгын газар 24 цагийн дотор Ерөнхийлөгчийн Тамгын газарт илгээнэ. Илгээсэн хууль, УИХ-ын бусад шийдвэрийг ЕТГ хүлээж авсан өдрөөс хойш ажлын таван өдөрт багтаан Ерөнхийлөгч бүхэлд нь буюу хэсэгчлэн хориг тавих эрхтэй.

Тэгэхээр хэрэв Ерөнхийлөгч УИХ-ын тухай хуулийн нэмэлт өөрчлөлтөд хориг тавихгүй бол Д.Гантулга гишүүний бүрэн эрхийг түдгэлзүүлэх асуудлыг прокурорын байгууллага дахин оруулж ирэх боломжтой юм байна.

Б.ТУЯА