Монгол Улсын Ерөнхий сайд У.Хүрэлсүх өнгөрсөн сард БНХАУ-д айлчлах үеэр Монгол-Хятадын бизнес эрхлэгчид нийт 4.6 тэрбум ам,долларын 36 гэрээнд гарын үсэг зурсан. Айлчлалын үеэр Монгол, Хятадын Гашуунсухайт-Ганцмодны боомтод үүссэн асуудалд онцгой анхаарал хандуулж, боомтын гарцыг 3:3 болгоод байгаа. Үр дүнд нь Монголоос нүүрс экспортлогч машины тоо 25 хувиар нэмэгдээд байгаа тухай ГЕГ-ын дарга Б.Асралт мэдээлэв. Гашуунсухайт боомтын дэд бүтцийг сайжруулахад 23 орчим сая долларын хөрөнгө оруулалт хийх асуудлыг энэ айлчлалаар шийдсэн байна.

Ерөнхий сайд У.Хүрэлсүх дараагийн айлчлалаа энэ сарын сүүлээр ОХУ-д хийх гэж байна. Тэрбээр жил бүр болдог "Санкт-Петербургийн олон улсын эдийн засгийн форум"-д оролцох юм. Түүний энэ удаагийн айлчлалын гол зорилго нь  Монгол, ОХУ-ын Транзит тээврийн гэрээнд гарын үсэг зурах явдал гэж эх сурвалжууд дурдаж байна.  Дөрөвдүгээр сарын сүүлээр ОХУ-ын Тээврийн дэд сайд А.В.Лушкинов Монгол улсад гэнэтийн айлчлал хийж, Монгол Улсаас гарч буй уул уурхайн гаралтай бүтээгдэхүүнүүдийг ОХУ-аар дамжуулан далайн боомтуудад хүргэн гуравдагч улсууд руу экспорт хийхэд 93 хүртэл хувийн хөнгөлөлт үзүүлэх тухай баримт бичиг бэлэн болсныг Улаанбаатар Төмөр Зам ХНН-ээс мэдээлээд байна.

Монгол Улсын Ерөнхийлөгч Х.Баттулга өнгөрсөн жил ОХУ-ын Владивоскот хотод болсон " Дорнын Эдийн засгийн III чуулга"-нд оролцох үеэр энэхүү гэрээг зурах асуудалд хоёр орны ойлголцлыг нэмсэн гэж  мэдэгдэж байсан юм. Тэрбээр форумын үеэр "Миний энд ирсэн гол асуудал бол манай хойд хөрш ОХУ-аар Монголын бараа, таваар дамжин өнгөрөхдөө тээврийн хөнгөлөлт авах зорилт агуулсан. Энэ зорилго үндсэндээ биеллээ гэж үзэж байна. Үүнд оролцож дэмжсэн Путин Ерөнхийлөгч болон албаны хүмүүст дахин баярлаж буйгаа хэлье. Хөгжиж байгаа Зүүн Азид Монгол хөл нийлүүлэн орно" гэсэн билээ.

Эх сурвалжуудын хэлж буйгаар хоёр орны транзит тээврийн гэрээний хөнгөлөлтийн асуудал нь 10 орчим жил үргэлжилж байгаа хэлэлцээ юм. Тэгэхээр Ерөнхий сайдын ОХУ-д хийх айлчлалаар энэ гэрээ эцсийн байдлаар зурагдвал хоёр орны харилцаанд түүхэнд тэмдэглэхүйц үйл явдал болох юм.