Испанийн хөл бөмбөгийн шигшээ баг Португалын багийг 1:0-ээр хожиж, Мексик, АНУ, Канад улсуудад зохион байгуулж буй 2026 оны Дэлхийн аварга шалгаруулах тэмцээний (ДАШТ) шөвгийн наймд шалгарлаа. Португалын довтлогч Криштиану Роналдугийн хувьд ДАШТ-ий талбайд сүүлчийн удаа гарлаа.
Өдгөө 41 настай Роналду энэ удаагийн ДАШТ түүний хувьд хамгийн сүүлчийнх байх болно гэдгийг өнгөрсөн ням гарагт мэдэгдсэн юм. Шигшээ багийнхаа төлөө хамгийн олон гоол оруулсан дээд амжилтын эзэн, "Алтан бөмбөг"-ийн (Ballon d'Or) таван удаагийн шагналт тэрбээр зургаан ДАШТ-д гоол оруулсан анхны хөлбөмбөгчин болсон билээ. Португалчуудын хувьд өндөрлөж буй энэ удаагийн тэмцээнд тэрбээр 5 тоглолтод оролцож, 3 гоол оруулсан бөгөөд нийт 6 тэмцээнд 11 гоол оруулсан амжилт үзүүллээ. Роналду Португалын шигшээ багийнхаа бүрэлдэхүүнд ДАШТ-д үзүүлсэн хамгийн өндөр амжилт бол 2006 оны дөрөвдүгээр байр юм.
Роналду ДАШТ-ий сүүлчийн тоглолтоо гарааны бүрэлдэхүүнд эхлүүлсэн. Гэвч түүнд гоол оруулах ганцхан бодит боломж гарсан юм. Эхний хагаст Жоау Феликс хаалганы өмнөх бүс рүү ирсэн дамжуулалтыг мөргөж Роналдуд хаяж өгсөн боловч Роналду хүчтэй цохиж чадаагүй тул Испанийн хаалгач Унаи Симон бөмбөгийг төвөггүй барьж авлаа. Ерөнхийдөө тоглолт эн тэнцүүхэн өрнөлөө. Тоглолтын төгсгөл хүртэл 0:0 харьцаатай байсан ч багууд бие биенийхээ хаалганы орчимд аюултай мөчүүдийг үүсгэж байв. Тэдгээрийн нэгэнд хамгаалагч Нуну Мендешийн цохисон бөмбөг өөр тоглогч дээр ойж, Симоны хаалганы хөндлөвчийг оносон юм.
Испаничууд довтолгоонд арай илүү аюул тарьж байлаа. "Улаан фури"-гийн хөлбөмбөгчид гурван ч удаа аюултай довтолгоо хийж, Португалын хаалгач Диогу Кошта үнэхээр ур чадвар гарган багаа аврав. Испанийн 18 настай тоглогч Ламин Ямаль төдийлөн онцгой аюул тарьж чадсангүй. Мендеш бэртлийн улмаас сэлгээнд суусан нь тоглолтыг эргүүлэх чухал мөч болсон байж магадгүй юм. Түүний оронд 56 дахь минутад Нельсон Семеду талбайд гарсан.
Испанийн шигшээ баг энэ ДАШТ-д чадварлаг хослолуудыг үзүүлээд байгаа бөгөөд тэдгээрийн нэг нь Португалтай хийсэн тоглолтын шийдвэрлэх гоол байлаа. Үндсэн цаг дээр нэмэлт эхний минутад Родри болон сэлгээгээр орж ирсэн Ферран Торрес, Микель Мерино нар гоолын довтолгоог зохион байгуулав. Талбайн төвд гарсан энгийн алдааны дараа испаничууд бөмбөгийг тоглолтод хурдан оруулж, Родри Торрест дамжуулалт өгч, Торрес бөмбөгийг торгуулийн талбай руу илгээснээр Мерино Коштаг хууран гоолдсон юм. Энэхүү хослол маш энгийн бөгөөд чадварлаг байсан тул португалчууд ийм эргэлтэд бэлэн байж чадсангүй.
Сонирхолтой нь Роналду энэ шатнаас хасагдах хувь тавилангаа өөрөө зөгнөчих шиг болсон. Хоёрдугаар хагасын ус уух хоёр дахь завсарлагааны үеэр Роналду арын албаны ажилтнуудын нэгэн чемоданыг өөр рүүгээ татаж, дээр нь суусан юм. Энэ нь бүтэлгүй зөгнөл болж таарав. Одоо Роналду ДАШТ-ээс ачаа тээшээ баглаад буцаж байна. Тоглолт дууссаны дараа Роналду нулимсаа барьж чадаагүй юм.
"Гайхалтай үе байлаа"
Португалын шигшээ багийн ахлах дасгалжуулагч, испани мэргэжилтэн Роберто Мартинес тоглолтын дараа албан тушаалаасаа огцорч байгаагаа мэдэгдлээ.
"Португалын ард түмэн энэ баг, эдгээр тоглогчоор бахархаж болно. Харамсалтай байна. Бид ч бас хаалганы хөндлөвч оносон. Бид тоглолтыг нэмэлт цаг руу сунгах эрхтэй байсан гэж бодож байна. Бид сайн хамгаалсан. Дэлхийн аваргад түрүүлэх магадлалтай багийн эсрэг тоглолоо. Магадгүй бидэнд ердөө л аз дутчихлаа. Аз өнөөдөр бидний талд байсангүй, гэхдээ тоглолт маш тэнцүү байсан. Энэ бол гайхалтай үе байлаа. Үгээр илэрхийлшгүй бахархал төрж байна. Португалын нийт ард түмнээс бидэнд өгсөн тэрхүү хүч чадал, эрч хүч үнэхээр гайхалтай байсан" гэж Мартинес хэлэв.
ТАСС
