АНУ-ын Тусгаар тогтнолын баярыг тэмдэглэх үеэр тус улсын хэд хэдэн хотод зэвсэгт халдлага гарч, долоон хүн амиа алдаж, олон арван хүн шархадсан тухай NBC News суваг мэдээлжээ.
Нью-Йорк хотын Брүклин дүүргийн Кони-Айлендад бямба гаригийн орой хар багтай этгээд гэр бүлээрээ баяр тэмдэглэж байсан хүмүүс рүү гал нээсэн байна. Халдлагын улмаас найман хүн шархадсаны дотор дөрвөн хүүхэд байгаа бөгөөд цээжиндээ буудуулсан 21 настай эмэгтэйн биеийн байдал хүнд байгаа аж. Зэвсэгт этгээд хэргийн газраас зугтсан тул цагдаа нар түүнийг эрэн сурвалжилж эхэлжээ.
Флорида муж улсын Пенсакола хотын төвд ням гаргийн шөнийн 01:00 цагийн орчимд болсон буудалцааны үеэр 19 настай залуу амиа алдаж, зургаан хүн шархаджээ. Гэмт этгээдийг одоогоор баривчлаагүй байна. Индиана муж улсын Форт-Уэйн хотод ням гаригийн үүрийн 03:00 цагийн үед буудалцаан болсны улмаас нэг эмэгтэй амиа алдаж, найман хүн буудуулсан шархтай эмнэлэгт хүргэгджээ.
Мөн тус муж улсын Гэри хотод ням гаригийн өглөө болсон хоёр тусдаа буудалцааны үеэр 10 настай хүү амиа алдаж, 50 настай эрэгтэйн биеийн байдал хүнд байгаа тухай мэдээлсэн байна.
Калифорни муж улсын Комптон хотод бямба гаригийн 23:30 цагийн орчим Тусгаар тогтнолын баярт зориулсан үдэшлэгийн үеэр буудалцаан болсны улмаас нэг эрэгтэй, нэг эмэгтэй амиа алджээ. Мөн нэг эрэгтэй, нэг эмэгтэй, нэг охин шархдан эмнэлэгт хүргэгдсэнээс шархадсан эрэгтэйн биеийн байдал хүнд байна.
Охайо муж улсын Дейтон хотын Орегон дүүрэгт долоодугаар сарын 3-ны орой болсон буудалцааны улмаас дөрвөн хүн шархадсан байна. Мөн тус муж улсын Кантон хотод салют буудуулах үеэр салют гэрийнх нь цонхоор орж ирж дэлбэрсний улмаас 46 настай эмэгтэй унтлагын өрөөндөө байхдаа нуруундаа хүнд гэмтжээ.
Миссүри муж улсын Сент-Луис хотод бямба гаргийн шөнө болсон буудалцааны улмаас 17 настай өсвөр насны хүүхэд амиа алдаж, 16 настай хоёр хүүхэд буудуулсан шархтай эмнэлэгт хүргэгдсэн байна. Калифорни муж улсын Чино хотод их хэмжээний салют дэлбэрсний улмаас нэг хүн амиа алдаж, хоёр хүн хүнд гэмтжээ.
Түүнчлэн АНУ-ын Тусгаар тогтнолын 250 жилийн ойд зориулан Ерөнхийлөгч Дональд Трамп үг хэлэхийн өмнө Вашингтон хотод нүүлгэн шилжүүлэх арга хэмжээ авсан тухай мөн мэдээлсэн байна.
Kazinform
