Хятад улс Тайвань арлын эргэн тойронд дахин томоохон хэмжээний цэргийн сургуулилалт эхлүүлжээ. "Joint-Sword-2024B" хэмээн нэрлэсэн сургуулилалт Тайванийн хоолой болон Тайвань арлаас хойш, урагш, зүүн хэсэгт явагдана гэж Хятадын Зэвсэгт хүчний зүүн бүсийн командлал өнөөдөр (10 дугаар сарын 14) мэдэгдсэн байна. 

“Энэхүү сургуулилалт нь Тайванийг тусгаар тогтнуулахыг эрмэлзэж буй салан тусгаарлах хүчний үйл ажиллагаанд өгч буй хатуу анхааруулга болж байна. Энэ бол улс орны тусгаар тогтнол, үндэсний эв нэгдлийг хамгаалах хууль ёсны бөгөөд зайлшгүй шаардлагатай арга хэмжээ юм" гэж Хятадын цэргийнхэн мэдэгджээ. 

Энэ удаагийн цэргийн сургуулилалт хэд хоног үргэлжлэхийг мэдэгдэлд дурдаагүй байна. Тайванийн Батлан хамгаалах яам Хятадын сургуулилалтыг "бодлогогүй, өдөөн хатгасан үйлдэл" хэмээн бураашааж, зэвсэгт хүчнээ байрлуулж байгаагаа мэдэгдсэн байна.

Эх сурвалж: Reuters