Манай бизнес эрхлэгч, эдийн засагчид гадаадын банк оруулж ирснээр мөнгөний хомсдлоос гарч, зээлийн хүү буурах боломжтой гэж үздэг. Тэгвэл банкны салбарын эхний хагас жилийн тойм судалгааг танилцуулах үеэр /2024.09.10/ Монголын Банкны Холбооны гүйцэтгэх захирал Л.Амар энэ асуудлаар байр сууриа илэрхийлсэн байна.

Л.Амар: 

-Төсвийн зардлыг нэмэгдүүлээд байвал зээлийн хүү яаж буурах вэ. Бодлогын хүү гол чиглүүлэгч нь. Бодлогын хүү буурч байж л зээлийн хүү буурна. Одоогоор Монголд салбараа нээх гэж байгаа банк алга. Байсан банкууд нь гараад явсан. Төлөөлөгчийн газрууд байсан ч өнгөрсөн жил хаагдлаа. Төрөлжсөн хөрөнгө оруулалтын банк орж ирэх хууль эрх зүйн орчныг хоёр жилийн өмнө бүрдүүлсэн ч сонирхоод ороод ирэх банк алга.

Гадаадын банк орж ирснээр зээлийн хүү буурна гэж байгаа бол өөрийнхөө хариуцлагыг өөр нэгэн рүү чиглүүлж байгаа хэлбэр. Төсвийн зардлаа амласан ёсоор ДНБ-ий 25 хувьд барьж байж макро орчинд эерэг дүр зураг гарч, зээлийн хүү буурах боломж олдоно.