Бүгд Найрамдах Чех Улсын Шадар сайд бөгөөд Хөдөлмөр, нийгмийн хэргийн сайд Мариан Юречкагийн айлчлалын хүрээнд МҮХАҮТ-аас "
Монгол-
Чехийн бизнес форум"-ыг зохион байгууллаа.
Форумын нээлтэд МҮХАҮТ-ын Ерөнхийлөгч Д. Энхтүвшин БНЧУ-ын Шадар сайд, Хөдөлмөр, нийгмийн хэргийн сайд Мариан Юречка, БНЧУ-ын Онц бөгөөд Бүрэн эрхт Элчин сайд ноён Ян Вытопил, БНЧУ-ын Үйлдвэр худалдааны яамны ЕХ-ны сан хариуцсан ахлах захирал Мариан Пиеха, Бүгд Найрамдах Чех Улсын Эдийн засгийн Танхимын Дэд ерөнхийлөгч Радек Якубскый нар оролцож үг хэлэв.
Талууд Монгол улс, Чехийн уламжлалт найрсаг хамтын ажиллагаа, худалдаа эдийн засгийн хөрөнгө оруулалтыг нэмэгдүүлэх, хоёр улсын бизнес эрхлэгчдэд харилцан ашигтай хамтын ажиллагаа, шинэ харилцаа холбоогоо нэмэгдүүлэх үр дүнтэй уулзалт болно гэдгийг дурдлаа.
Мөн Форумын үеэр МҮХАҮТ-ын Ерөнхий нарийн бичгийн дарга С.Баясгалан, “Монгол дахь бизнес боломжууд: Уул уурхайн бус экспорт”, ЭЗХЯ-наас "Монголын бизнесийн болон хөрөнгө оруулалтын орчин" сэдвээр тус тус илтгэл тавив.
Бизнес уулзалтад Чехийн талаас хууль эрх зүй, барилга үл хөдлөх, санхүү банк болон эрүүл мэнд, ус цэвэршүүлэх техник технологи, тээвэр логистикийн салбарын 20 гаруй аж ахуйн нэгж, Монголын талаас 100 гаруй бизнес эрхлэгчид оролцож хамтын ажиллагааны талаар саналаа солилцлоо.
Энэхүү айлчлалын хүрээнд Монголын зах зээлд 20 гаруй жил хамтран ажиллаж байгаа үйлдвэрийн бохир ус цэвэрлэх байгууламжийн зураг төсөл, тоног төхөөрөмж ашиглалтын чиглэлээр үйл ажиллагаа явуулдаг Хаанзаа компани нь Чех улсын санхүүжилтээр хэрэгжиж буй “Орон нутгийн жижиг төслүүд”-ийн хүрээнд Монголын арьс ширний үйлдвэрлэлийн холбоонд хаягдал уснаас өөх тосыг хайлуулах тоног төхөөрөмжийг нийлүүлж байгаа юм.
Чех улсад 12000 гаруй Монголчууд ажиллаж амьдарч байгаа ба Монгол Улсын Ерөнхийлөгчийн “Илгээлт-2100” тэтгэлэгт хөтөлбөрийн шугамаар 2023-2024 оны хичээлийн жилээс эхлэн жил бүр 30-60 монгол оюутан Чехийн шилдэг их, дээд сургуулиудад суралцах боломж нээгдээд байгаа аж.
