НҮБ-ын Даян Дэлхийн Гэрээ (ДДГ)-нд хэрхэн нэгдэн орох тухай хувийн хэвшил ба НҮБ-ын хамтарсан уулзалт 2023 оны 5 дугаар сарын 23-ны өдөр болж, МҮХАҮТ, Танхимын дэргэдэх Компанийн нийгмийн хариуцлага (КНХ) ба Тогтвортой хөгжлийн зөвлөл, уул уурхай, хүнд үйлдвэр, банк, санхүү, хүнсний үйлдвэрлэл, боловсролын чиглэлээр үйл ажиллагаа явуулдаг төрийн болон хувийн хэвшлийн компаниуд идэвхтэй оролцлоо. Тухайлбал Төрийн Банк, Эрдэнэт Үйлдвэр ТӨҮГ, Дарханы Төмөрлөгийн Үйлдвэр ТӨХК, IWFCI (Олон Улсын Эмэгтэйчүүдийн Худалдаа Аж Үйлдвэрийн Холбоо), Инвескор ББСБ болон Эдүкэйтэд Энтерпрайз ХХК-ийн төлөөллүүд оролцож санал солилцов.
МҮХАҮТ-ын КНХ ба тогтвортой хөгжлийн зөвлөлийн дарга Ж.Сүнжидмаа хурлыг даргалж, НҮБ-ын Монгол дахь суурин төлөөлөгчийн газрын Хөгжлийн зохицуулалтын мэргэжилтэн, эдийн засагч Сангвон Лим, НҮБ-ын ДДГ-ний Ази Номхон далайн бүсээс Даян дэлхийн үйл ажиллагаа хариуцсан ахлах менежер Неха Даз болон бүсийн олон нийтийн оролцоог хариуцсан менежер Симиао Юү нар танилцуулга хийлээ. Танилцуулга болон хэлэлцүүлгийн хүрээнд ДДГ-нд нэгдэхийн ач холбогдол, өгөөж, үүрэг хариуцлага мөн хэрхэн нэгдэх талаар дэлгэрэнгүй мэдээлж, харилцан ярилцав.
НҮБ-ын ДДГ-нд Монгол Улсаас одоогоор Хаан банк болон Инвескор нэгдэн орсон бөгөөд энэхүү уулзалт, санаачилгын хүрээнд МҮХАҮТ-ын гишүүн хэд хэдэн томоохон компани, бизнесийн байгууллагууд олон улсын хэмжээний энэхүү чухал санаачилгад нэгдэн орох сонирхлоо илэрхийлээд байна. Түүнчлэн, ДДГ-ний Монголын сүлжээг байгуулах талаар түнш байгууллагууд хэрхэн хамтрах талаар ярилцлаа.
НҮБ-ын ДДГ нь дэлхий даяарх бизнесийн тогтвортой байдал, мөн тэдний нийгмийн сайн сайхны төлөөх үйл ажиллагааг дэмжих зорилгоор 2000 оноос хэрэгжиж буй олон улсын томоохон санаачилга юм. МҮХАҮТ энэхүү санаачилгад 2006 онд нэгдсэн бөгөөд бизнесийн төлөөллийн гол байгууллагын хувьд ДДГ-ний үндсэн зорилтуудыг дэмжин ажиллаж байна.
