“Тогтвортой Сарлагийн aрьс” төслийн хүрээнд МҮХАҮТ, Монголын Арьс Шир Үйлдвэрлэгчдийн Холбоо (МАШҮХ) болон төслийн оролцогч талууд хамтран шинэ технологи танилцуулах сургалтыг 4 дүгээр сарын 24-нөөс 29-ний хооронд зургаан өдрийн турш зохион байгууллаа.

"Булигаар" ХХК, "Бренд гутал" ХХК болон МАШҮХ-ны гишүүн байгууллагуудын төлөөлөл 30 гаруй хүн хамрагдсан тус сургалтыг онол, практик хослуулан явуулсан бөгөөд сүүлийн үеийн арьс идээлгийн технологи болох "нойтон идээлэг"-ийн технологийг танилцуулсан юм.

Идээлгийн ийм технологийг арьс шир боловсруулах үйлдвэрлэлд нэвтрүүлснээр усны хэрэглээг 20-30 хувиар, буруу боловсруулалтаас үүдэлтэй хог хаягдал болон байгаль, хүрээлэн буй орчинд үзүүлэх хор нөлөөг бууруулахаас гадна арьс шир боловсруулах явцад үүссэн гэмтэл, бүрэн бус боловсорсон арьс ширийг нөхөн сэргээх боломжтой аж. Мөн энэхүү нойтон идээлгийн технологийг нэвтрүүлснээр тогтвортой, байгаль орчинд ээлтэй сарлагийн арьсан бүтээгдэхүүний үйлдвэрлэлийг нэмэгдүүлж, экспортыг хөгжүүлэх боломж бүрдэх юм.

Сургалтыг Испани Улсын Технологи, Инновацын төвийн /INESCOP/ Материал үйлдвэрлэл лабораторийн дарга Элена Банон, ХБНГУ-ын Фрайберг эрдэм шинжилгээний хүрээлэнгийн арьс шир үйлдвэрлэлийн төвийн дарга, химич Стеван Гатлинг нар удирдан чиглүүлж, шинэ технологийг танилцууллаа.

Уг сургалт "Свитч Азиа" тэтгэлэгт хөтөлбөрийн хүрээнд Европын холбооны санхүүжилтээр хэрэгжиж буй “Ургамлын аргаар идээлүүлсэн Монгол сарлагийн арьс шир ба арьсан бүтээгдэхүүний кластерийн био-арьс болон био-арьсан бүтээгдэхүүн үйлдвэрлэх чадавхыг бэхжүүлэх төсөл”-ийн хүрээнд зохион байгуулагдав.