МҮХАҮТ-ын Ерөнхийлөгч О.Амартүвшин ОХУ-ын Монгол Улс дахь худалдааны төлөөлөгч Максим Васильевтай уулзаж, “Монгол-БНХАУ-ОХУ-ын Худалдаа Аж Үйлдвэрийн Танхимуудын худалдаа, эдийн засгийн нэгдсэн XVI чуулган", ОХУ-д зохион байгуулагдах Залуу инженерүүдийн техник, шинжлэх ухааны үзэсгэлэн, "ИННОПРОМ-2023" олон улсын аж үйлдвэрийн үзэсгэлэнгийн талаар санал солилцлоо.
ОХУ-ын Монгол Улс дахь худалдааны төлөөлөгч Максим Васильев ОХУ-ын талаас стандартын шаардлага хангасан Монголын ноос, ноолууран, мах, махан, арьс ширэн бүтээгдэхүүний гаалийн татварын хөнгөлөлтийг шийдвэрлэхээр ажиллаж байгаа талаар уулзалтын эхэнд тэмдэглээд, 6 дугаар сарын 8-10-ны өдрүүдэд Улаанбаатар хотноо болох “Монгол-БНХАУ-ОХУ-ын Худалдаа Аж Үйлдвэрийн Танхимуудын худалдаа, эдийн засгийн нэгдсэн XVI чуулган"-д тус улсын зүгээс өндөр ач холбогдол өгч байгааг онцлов.
Тус чуулган болон чуулганы үеэр зохион байгуулах “Жижиг дунд үйлдвэрийн бүтээгдэхүүн, үйлчилгээ, технологи-2023” олон улсын үзэсгэлэн худалдаанд ОХУ-ын холбогдох албан тушаалтнууд, аж ахуйн нэгжүүдийг оролцуулах, арга хэмжээг өндөр хэмжээнд зохион байгуулахад бүх талаар дэмжлэг үзүүлэн ажиллахаа илэрхийллээ. Мөн 4 дүгээр сард ОХУ-ын Краснодар хотод болох Залуу инженерүүдийн техник, шинжлэх ухааны олон улсын үзэсгэлэнд Монголын талаас оролцох сонирхолтой инженер залуусыг оролцуулах, 7 дугаар сарын 10-13-ны өдрүүдэд Екатеринбург хотноо болох ИННОПРОМ-2023 олон улсын аж үйлдвэрийн үзэсгэлэнд Монголын томоохон аж ахуйн нэгжүүдийг оролцуулахад хамтран ажиллахыг хүсэв.
МҮХАҮТ-ын Ерөнхийлөгч О.Амартүвшин “Монгол Улс-БНХАУ-ОХУ-ын Худалдаа Аж Үйлдвэрийн Танхимуудын Худалдаа, эдийн засгийн нэгдсэн чуулган" нь цар тахлын дараа зохион байгуулагдаж буй учраас оролцогч талуудын хүлээлт өндөр байгааг онцлоод энэ удаагийн чуулган тээвэр логистик, чөлөөт бүс, худалдааг хөнгөвчлөх зэрэг асуудлыг хөндөн ярилцахаас гадна бизнес форум зохион байгуулж, эрчим хүч, дэд бүтцийн салбарт хөрөнгө оруулалт татах төслүүдээ танилцуулна гэлээ. Мөн чуулганы үеэр Монгол Улс-БНХАУ-ОХУ-ын бизнесийн зөвлөлийг байгуулахаа саналаа илэрхийлэв.
Түүнчлэн, сонирхогч талуудад мэдээлэл хүргэх, хамтын ажиллагааны боломжуудыг ажил хэрэг болгоход хамтран ажиллахыг хүсээд, төлөвлөгдсөн дээрх арга хэмжээнүүдийн зохион байгуулалтад уялдаа холбоотой ажиллана гэж хэллээ.
