Монголд зочлох жилийн хүрээнд 2023 онд нэг сая жуулчин хүлээн авах зорилт тавьсан. Энэ зорилтын биелэлт ямар түвшинд байгаа талаар БОАЖЯ-ны Аялал жуулчлалын бодлого, зохицуулалтын газрын мэргэжилтэн Н.Болормаа дараах мэдээллийг өгсөн байна.
Н.Болормаа:
-"Засгийн газрын үйл ажиллагааны хөтөлбөр болон Монголд зочлох жилийн хүрээнд нэг сая жуулчин хүлээж авах зорилт тавьсан байдаг. Цар тахлын дараа жуулчдын урсгалыг нэмэгдүүлэх, тэндээс олох эдийн засгийн өгөөжийг сайжруулах тал дээр ажиллаж байна. Аравдугаар сарын 17-ны байдлаар Монголд 542,123 гадаадын жуулчин иржээ. Энэ нь цар тахлын өмнөх нөхцөл байдал руу дөхөж очсон үзүүлэлт юм. Өөрөөр хэлбэл 2019 онд Монгол Улс хамгийн олон жуулчин буюу 577,000 жуулчин хүлээн авсан байдаг. Хэдийгээр 2023 онд нэг сая жуулчин хүлээж аваагүй ч цар тахлын дараа идэвхжүүлсэн хамгийн том салбар аялал жуулчлал болж, өмнөх амжилт руугаа дөхөж байна" гэсэн байна.
Мөн манай улсад ирж буй жуулчдын ихэнх хувийг Орос, Хятад, Солонгос, Япон, Казахстаны иргэд эзэлдэг. 2023 онд ОХУ-ын жуулчид нэлээд өндөр хувьтай буюу эхний байранд орсон байна. 2023 онд ОХУ-аас 193,000 гаруй, Өмнөд Солонгос улсаас 127,000 гаруй жуулчин манай улсад иржээ. Үүний араас Хятад, Казахстан, Япон улсын жуулчид орсон байна.
2023 онд Монгол Улсад ирсэн жуулчид 700 орчим сая ам.долларын орлогыг манай улсад оруулжээ.
