“Евразийн конгресс-2023” энэ оны зургадугаар сарын 8-9-нд Сочи хотноо зохиогдоно хэмээн Евразийн Хөгжлийн банк мэдээллээ.

Энэхүү арга хэмжээнд дэлхийн 20 гаруй улсын төлөөлөгчид оролцоно. Евразийн конгресс нь уламжлал ёсоор бизнес эрхлэгчид, санхүүгийн байгууллагууд, төрийн байгууллагууд болон шинжлэх ухааны байгууллагын эрдэмтэн, шинжээчдийн хооронд байр сууриа нээлттэй илэрхийлэх талбар болдог.

Энэ жилийн хувьд хамтын ажиллагааны хэд хэдэн амин чухал салбарын асуудал хөндөгдөнө. Тухайлбал, Төв Азийн бүс нутагт усны эрчим хүчний цогцолбор хөгжүүлэх тухай болон тээвэр ложистикийн дэд бүтцийг байгуулах, улс хоорондын аж үйлдвэрлэл болон дижитал шилжилтийн төслүүдийг боловсруулах зэрэг асуудлыг “Евразийн конгресс-2023”-ын үеэр хэлэлцэнэ.

Мөн үүсээд буй шинэ нөхцөл байдалд хүнсний аюулгүй байдлыг хэрхэн асуудлыг тусгайлан хэлэлцэх юм. Үүнээс гадна Евразийн Хөгжлийн банкны боловсруулсан “Төр болон хувийн хэвшлийн хил дамнасан түншлэл” сэдэвтэй дүн шинжилгээ бүхий илтгэлийг танилцуулна.

Конгрессийн үеэр дараах салбар хуралдаанууд болно. Үүнд, “Евразийн тээврийн ложистик”, “Евразийн усны эрчим хүчний цогцолбор”, “Евразийн ирээдүй: асуудлаас шийдэл рүү”, “Улс хоорондын аж үйлдвэрийн хөрөнгө оруулалтын төслүүд”, “Евразийн интеграцийн хөтлөгч хүч нь өндөр технологи болох нь”, “Улс хоорондын хил дамнасан төр-хувийн хэвшлийн түншлэл нь хөрөнгө оруулалтын төслүүдийг хэрэгжүүлэх гол механизм” гэсэн салбар хуралдаан, хэлэлцүүлгүүд явагдана.

Евразийн конгресс нь энэ жил гурав дахь удаагаа зохиогдох гэж байна. 2020 болон 2021 онд болсон конгрессоор Евразийн Хөгжлийн банкны нөлөөг тэлэх, Евразийн Эдийн засгийн холбоо болон Монгол Улсын хамтран хэрэгжүүлэх шинэ төслүүдийн талаар хэлэлцэж байсан.

Өнөөдрийн байдлаар Монгол болон Евразийн Эдийн засгийн холбоо хооронд худалдааны тэнцвэр алдагдалтай байгаа юм. Евразийн Эдийн засгийн холбооны орнуудаас Монгол руу хийж буй экспорт 2,7 тэрбум ам.доллар байгаа бол импорт нь 60 сая ам.доллар байна. Энэхүү тэнцвэргүй байдлыг засч залруулах хэрэгтэй байгааг Монгол Улсын Шадар сайд, Эдийн засгийн хөгжлийн сайд Ч.Хүрэлбаатарын 2023 оны дөрөвдүгээр сард Москвад хийсэн айлчлалын үеэр яригдсан.

Монгол Улс нь ОХУ болон Евразийн Эдийн засгийн холбооны улсуудын зах зээлд ноолуур, малын мах, арьс шир нийлүүлэх сонирхолтой хэвээр байгаа. Малын махны экспортын хувьд хорио цээрийн норм, шаардлагыг хангах тал дээр шийдэгдээгүй асуудлууд байсаар байна. Гэсэн ч Москвагийн зүгээс тулгамдаж буй асуудлыг нааштайгаар шийдэж, цаашдын түншлэлийн харилцаагаа хөгжүүлэх тал дээр эерэг байр суурьтай байгаа талаар ОХУ-ын Ерөнхий сайдын орлогч Алексей Оверчук энэ 2023 оны тавдугаар сард мэдэгдсэн.

Сочид зохиогдох Евразийн конгрес нь цаашдын хамтын ажиллагааны ирээдүйгээ хэлэлцэх сайхан талбар болох юм.

А.Гангар