ХХААХҮ-ийн сайд Х.Болорчулуун Францын зочид төлөөлөгчдийг хүлээн авч уулзан, Францаас өндөр ашиг шимт мал импортлон махны чиглэлийн үхрийн эрүүл бүс байгуулах, хөдөө аж ахуйн чиглэлээр суралцдаг оюутнууд туршлага судлах сургалт зохион байгуулах, газар зүйн заалтад нутгийн бүтээгдэхүүнийг бүртгүүлж, хамгаалах асуудлаар санал солилцов. Мөн хөдөө орон нутгийн хөгжил, мал аж ахуй, хөдөө аж ахуйн гаралтай бүтээгдэхүүнийг эдийн засгийн эргэлтэд оруулан нэмүү өртөг шингээх, ялангуяа гүүний хатаасан саам, саамын тос зэрэг бүтээгдэхүүнд газар зүйн заалтыг таниулахад хамтран ажиллах тухай ярилцлаа. 

Бүгд найрамдах Франц улсын Хөдөө аж ахуй, хүнсний Бүрэн Эрхт сайд Марк Фену, “Монгол Улс өргөн уудам газартай, уламжлалт мал аж ахуйн нөөц бололцоотой гэдгээрээ Франц Улстай адилхан. Францын мон биллиард үүлдрийн үхрийг монголчууд мэддэг, ялангуяа мах, сүүний үүлдрийг импортлох сонирхолтой байна. Мөн Францын тал сургалтын чиглэлээр, малын гаралтай бүтээгдэхүүн хэрэглэгчийн ширээнд хүртэлх шат дамжлагын эрүүл ахуйг хангахад хамтарч ажиллах боломжтой. Монголд маш сайн бүтээгдэхүүн олон байгааг хилийн чанадад таниулах ёстой. Франц Улс газар зүйн заалттай бүтээгдэхүүнийг хамгаалах талаар 90 жилийн туршлагатай. Энэ нь нэг талаас мэргэжлийг, нөгөө талаас тухайн бүс нутгийн бүтээгдэхүүнийг хамгаалдаг. Монголын сайн чанартай бүтээгдэхүүнүүдийг гадаадад таниулснаар хол, ойрын хөршүүддээ бүтээгдэхүүнээ экспортлох боломжтой” гэв. 

Уулзалтаар ярьсан нэг чухал зүйл нь “1000-д 4” буюу хөрсний үржил шимийг сайжруулах, элэгдлийг бууруулах, органик бодисуудыг хөрсөнд нь хадгалах тухай олон улсын санаачилга юм. Монгол, Францын хооронд энэ онд хэд хэдэн томоохон айлчлал төлөвлөсний эхнийх нь ийнхүү хөдөө аж ахуйн салбараас эхэлсэн. Хоёр орны улс төрийн харилцаа өндөр түвшинд байгаа ч эдийн засгийн харилцаа, худалдааны хэмжээ, ялангуяа хөдөө аж ахуй, хүнсний салбарын чадавхыг бүрэн дүүрэн ашиглахгүй байгааг харгалзан “Захиргааны зохицуулалтын хэлэлцээр”-ийг 2022 онд шинэчлэн байгуулсан аж.