УИХ-ын дарга Г.Занданшатарын хүүхдүүд Боловсролын зээлийн сангаас авсан зээлээ гэрээт хугацаандаа төлж барагдуулсан тухай сангийн захирал асан Д.Гарьди залруулга хийжээ. Занданшатарын Алтангэрэл Калифорнийн их сургуульд олон улсын эдийн засагч мэргэжлээр 4 жил сурахдаа 93 мянган долларын, Занданшатарын Должинсүрэн мөн сургуульд сэтгэл судлалын мэргэжлээр 4 жил сурахдаа 13 мянган долларын зээл авсан юм байна.

Боловсролын сангийн зээл буюу Засгийн газрын захиалгаар суралцсан бол тухайн мэргэжлээрээ төрийн болон төсвийн байгууллагад 5-аас доошгүй жил ажиллах үүрэгтэй. Гэрээгээр хүлээсэн үүргээ биелүүлээгүй буюу хувийн байгууллагад шилжиж ажилласан тохиолдолд авсан зээлээ графикийн дагуу буцаан төлөх үүрэгтэй. Тэгэхээр УИХ-ын даргын хүү, охин хоёр гэрээний хоёр дахь үүргийг хүлээж авсан юм байна.

Мөн УИХ-ын гишүүн Хууль зүйн сайд асан Ц.Нямдоржийн хүү Н.Анхбаяр Шинэ Зеландын Веллингтон хотын Виктория их сургуулийг эрх зүйч мэргэжлээр төгсч ирээд 2007 оноос Гадаад харилцааны яамны Гэрээ, зүйн газарт мэргэжилтэн, атташегаар ажлын гараагаа эхэлсэн. 2020 оны 7 дугаар сараас тус яамны ТНБД-аар ажиллаж байгаа.

Төрийн албанд 16 дахь жилдээ ажиллаж байгаа энэ хүн ажил мэргэжилдээ тэнцдэг тэнцдэггүй тухай бол мэдэхгүй юм. Гэхдээ лайвчин Д.Мөнх-Эрдэнийн бухимдаад байсан зүйл бол жирийн айлын хүүхдэд олддоггүй сургалтын зээлийг яахаараа Ц.Нямдоржийн хүүхэд авч сураад, тэгээд ямар ч шалгуур шүүлтүүргүйгээр дипломат албанд орчихдог юм бэ? гэдэг асуулт байсан. Эхнийх нь гэрээний асуудал. Хоёр дахь нь ёс суртахууны асуудал юм даа.

Шадар сайд С.Амарсайхан байна. Монголын толгой баячуудын нэг. Бас л Боловсролын сангийн зээлээр хүүхдээ сургасан, зээлээ төлөөгүй. Тэр байтугай хүүхэд нь төрийн албанд ажилладаг ч үгүй.

Ер нь бол Үндсэн хуульд заасны дагуу Монгол Улсын иргэн бүр сурч боловсрох ижил тэгш боломжоор хангагдах эрхтэй. Сайдын хүүхэд ч бай, жолоочийн хүүхэд ч бай яг ижил шалгуураар өрсөлдөх ёстой. Хэрвээ төрийн сан, татвар төлөгчдийн мөнгөөр суралцаж байгаа бол шүү дээ.

Тийм болохоор Боловсролын сангийн зээлийг олгохдоо яг ямар шалгуур тавьдаг, аль аль мэргэжлийг чухалчилдаг, хэн, хэний хүүхэд өрсөлдөж байгаа гээд бүх зүйл нь эхнээсээ ил тод, нээлттэй явдаг болмоор байна. Тэгэхгүй бүгдийг нь нууж хаачихаад, Боловсролын яам, Сангийн яамны хэдэн түшмэлүүдэд эрх мэдлийг өгчихөөд, нэг хэсэгт нь давуу байдал олгож, нөгөө хэсгийг нь гомдоочихоод нийгмээ талцуулаад баймааргүй байна. Энэ тийм хэцүү гэжүү? Зөвхөн манайд л яагаад юм бүхэн ийм хэцүү, салбар болгон тийм дампуу байдаг юм бэ?

Б.ЗАЯА