Сонирхогчдын боксын 2019 оны ДАШТ-ий хагас шигшээгийн тулаан өчигдөр /2019.09.20/ өндөрлөж, Азийн наадам, ААШТ-ий алтан медальт Э.Цэндбаатар 57 кг-ийн жинд Узбекстаны боксчин М.Мирзахайлиловт 28:29, 28:29, 28:29, 28:29, 27:30 буюу 5:0 харьцаатай хожигдож дэлхийн аваргаас хүрэл медаль хүртлээ.
Тоглолтын дараа Монголын боксын холбооны ЕНД Ц.Батнасан тулааны шийдвэрийг эсэргүүцэн ОУ-ын боксын холбоонд дүрмийн дагуу эсэргүүцлийн протест бичиж өгсөн тухайгаа өөрийн цахим хуудсанд бичсэн байна. Гэвч тэмцээний шүүгчийн баг “эсэргүүцлийг хүлээж авахгүй” гэсэн албан ёсны хариуг өгчээ.
Ингэснээр манай боксчин ДАШТ-ээс хүрэл медаль хүртэж байна. Э.Цэндбаатар медалийн өнгөө хувиргах тулааныг AIBA буюу Олон улсын сонирхогчдын боксын холбооны ерөнхийлөгч Гафур Рахимовын нутаг нэгт тамирчны эсрэг хийж ялагдал хүлээлээ.