“Токио 2020” олимпын наадмын өмнөх том сорилго болсон ДАШТ-д амжилт муутай оролцсон Монголын жүдо бөхийн шигшээ багийн дасгалжуулагч нар хариуцлага хүлээн, үүрэгт ажлаасаа чөлөөлөгдөж байгаагаа өнгөрөгч долоо хоногт мэдэгдсэн билээ. Шигшээ баг Токиод болсон ДАШТ-ийг эмэгтэйчүүдийн 48 кг-ын жинд М.Уранцэцэгийн ганц хүрэл медальтай өндөрлүүлсэн.
Тэдний оронд хэнийг томилох нь бөх сонирхогчдын анхаарлын төвд ороод байв. Тэгвэл өнөөдөр Монголын жүдо бөхийн холбоо өөрийн фэйсбүүк хуудсаараа дамжуулан, Монголын жүдо бөхийн шигшээ багийн Ерөнхий дасгалжуулагчаар Монгол Улсын Гавьяат тамирчин, Гавьяат дасгалжуулагч Халиуны Болдбаатарыг сонгосноо зарлалаа.
Жүдо бөхийн холбооны мэдэгдэлд “Монголын Жүдо бөхийн шигшээ багийн дасгалжуулагчаар Х.Болдбаатарыг томиллоо. Гавьяат дасгалжуулагч, Гавьяат тамирчин Х.Болдбаатар өнөөдөр Монгол Улсын Хөдөлмөрийн баатар, Ардын багш, Гавьяат тамирчин О.Балжиннямаас ажлаа хүлээж авах бөгөөд тэрбээр шигшээ багийн дасгалжуулагчдын багаа өөрөө бүрдүүлж, 2020 оны Токиогийн олимпын наадамд оролцох юм. ХАМТЫН ХҮЧ АМЖИЛТ” гэж дурджээ.