Цаг уур, орчны шинжилгээний газрын дарга С.Энхтүвшин өнөөдөр болсон Улсын Онцгой комиссын өргөтгөсөн хуралдаанд 2019-2020 оны өвлийн улирлын цаг уурын төлөв байдлын талаар танилцуулга хийв.

С.Энхтүвшин: "2019 оны долдугаар сарын сүүлийн хагас, наймдугаар сарын эхний 10 хоногт нутгийн ихэнх хэсгээр олон жилийн дунджаас ахиу хур тунадас орлоо. Наймдугаар сарын 24-26 болон 28-31-нд ихэнх нутгаар бороо орох төлөвтэй байна. Энэ сарын эцсээр уулархаг нутгаар нойтон цас орж, нутгийн хойд хэсгээр агаар хөрсөнд цочир хүйтрэх төлөвтэй байна" гэв.

Есдүгээр сард Баян-Өлгий, Ховд, Говь-Алтайн нутаг олон жилийн дунджаас сэрүүн, Дорнодын өмнөд хэсэг, Сүхбаатарын нутгаар олон жилийн дунджаас дулаан, бусад нутгаар дунджийн орчим температуртай байх төлөвтэй байна.

Мөн өвлийн цаг агаарын урьдчилсан мэдээ наймдугаар сарын 25 гэхэд гарч дуусдаг бөгөөд өнөөдрийн байдлаар бодолт явагдаж байгаа аж.

Ерөнхий төлөв мэдээ: Сүүлийн жилүүдэд Хойд туйлын хүйтэн агаарын урсгал есдүгээр сарын дунд үеэр манай орныг дайран өнгөрдөг болсноос үүдэн энэ үеэр ахиухан хэмжээний цас орж, цасан шуурга шуурч, газар тариаланд сөргөөр нөлөөлдөг болоод байгаа. Энэ жилийн хувьд Хойд туйлын хүйтэн агаарын цөмрөл есдүгээр сарын сүүлийн хагаст тохиож болзошгүй байгааг онцгойлон анхаарах хэрэгтэй.

Мөн энэ хавар арай эрт дулаарч, анхны бороо олон жилийн дунджаас эрт орж, борооны улирал мөн хэд хоногийн өмнө эхлэн өнөөдрийг хүртэл үргэлжилсэн хэвээр, ихэнх гол мөрд үерийн түвшинг даваад байна. Цаашид тунадас байгалийнхаа жамаар бага зэрэг буурах боловч, намрын саруудад олон жилийн дунджаас арай ахиу орж, эрт сэрүүсэх төлөвтэй байгаа юм.

Ес, аравдугаар сард үе үе нойтон цас орж, цочир хүйтрэх, цасан болон шороон шуурга шуурч ургац хураалтад сөргөөр нөлөөлж болзошгүйг анхааралдаа авахыг мөн хэллээ.

Арваннэгдүгээр сарын дунд үе гэхэд нийт нутгаар тогтвортой цасан бүрхүүл тогтсон байх төлөвтэй байна. Цас цаашид хайлахгүй нэмэгдэх, өвлийн турш нэлээд зузаан цасан бүрхүүлтэй байх, цас ахиу орсон нутгаар олон жилийн дунджаас хүйтэн байх аж.