“Газрын биржийн цахим төв”-өөр дамжуулан Газрын биржийн цахим систем /www.mle.mn/-тэй холбоотой бүх үйлчилгээг авахын зэрэгцээ уг биржэд лавлах үйлчилгээний нэгдсэн систем “Call center” болон Газрын бүртгэлийн тэмдэгтийн хураамж төлөх “Гэрэгэ Киоск”-ийг байршуулсан нь иргэдэд төрийн үйлчилгээ авахад илүү ойртож байна.

Газрын гэрчилгээний хураамж, Кадастрын зургийн үнэ, Барьцаа бүртгэлийн хураамж, Газар эзэмших, ашиглах эрх олгосон захирамжийн лавлагааны үнэ төлбөр, Газар эзэмших, ашиглах гэрчилгээ үрэгдүүлсэний торгууль, Дуудлага худалдааны дэнчин, хураамжийг “Гэрэгэ Киоск”-оор төлөх боломж нээгдэж байгаа юм.

Харин Газрын биржийн цахим систем /www.mle.mn/-ээс иргэд, олон нийт газар өмчлөх, эзэмших, ашиглах болон эрхээ бусдад шилжүүлэхтэй холбоотой арилжаа, газар өмчлөх, эзэмших эрхийн барьцааны лавлагаа, газар болон үл хөдлөх хөрөнгийн зах зээлийн үнийн мэдээ мэдээллийг авах боломжтой.

Лавлах үйлчилгээний нэгдсэн систем Call center/77771285/-ээр Газар өмчлөх, эзэмших, ашиглахад бүрдүүлэх материалын жагсаалт, Газрын төлбөр төлөх дансны дугаар , Үзүүлж буй үйлчилгээний талаарх дэлгэрэнгүй мэдээллээр хангаж мессэнжэр болон СМС лавлагаа үйлчилгээ үзүүлэх юм.

Газрын биржийн цахим систем /www.mle.mn/-ийг Үндэсний орон зайн өгөгдлийн дэд бүтэц, Газрын кадастрын мэдээллийн сан болон бусад байгууллагын мэдээллийн сантай шууд холбогдон ажиллах боломжтой, ашиглахад хялбар байдлаар хөгжүүлсэн бөгөөд иргэд олон нийт гар утас, таблет, компьютер ашиглан өөрийн оролцохыг хүссэн дуудлага худалдаа, төсөл сонгон шалгаруулалтандаа байршил харгалзахгүй хамрагдаж, газартай холбоотой мэдээ, мэдээллийг авч, газрын дуудлага худалдаа, түрээсийн зараа оруулж арилжаалах боломжийг бүрдүүлсэн. Өөрөөр хэлбэл, газартай холбоотой бүхий л мэдээллийг одоо гар утаснаасаа авах боломжтой боллоо.