“Бүс нутгийн даяарчлал ба Монгол Улс” сэдэвт эрдэм шинжилгээний хурал боллоо.
ШУА-ийн Олон улсын харилцааны хүрээлэнгээс зохион байгуулж буй олон улсын энэхүү хуралд БНХАУ-ын Жилиний их сургууль, ОХУ-ын Байгалийн болон Дорнод Сибирийн Технологи, менежментийн их сургууль, АНУ-ын Сэлфордын их сургуулийн эрдэмтэн профессорууд оролцлоо.
ШУА-ийн ОУХХ-гийн зөвлөх судлаач, доктор Д.Золбоо "Азийн бүс нутгийн байгууллагын үйл ажиллагаан дахь Монгол улсын үүрэг оролцоог нэмэгдүүлэх төслийн хүрээнд энэ хурлыг зохион байгууллаа. 2017 оноос эхэлсэн энэ онд дуусч төслийн хүрээнд хамтарч ажилласан байгууллагуудын судалгааны дүнг нэгтгэж, тайлан болгон олон нийт, бодлого боловсруулагчдад хүргэхэд өнөөдрийн хурлын зорилго оршино” гэж байлаа.
Энэ үеэр "Нэг бүс - нэг зам" олон улсын төсөл боловсруулахад: Хятад, Орос, Монгол улс, “Монгол, Орос, Хятад гурван улсын эдийн засгийн коридор”, “Даяаршил дахь Хятад, Япон, Солонгосын бүс нутгийн хамтын ажиллагаа ба засаглал", “Монгол Улсын гадаад худалдаа, эдийн засгийн хөгжил”, ”Хятадын Торгоны Замын эдийн засгийн бүсийг судлах нь: Бүс, ба Зам санаачлагын хүрээнд Монгол, Казахстаныгхарьцуулах нь”, “Бүс нутгийн интеграци дахь Хятад, Монголын харилцааны шинэ хөгжил” зэрэг 10-аад илтгэлийг гурван орны эрдэмтэд хэлэлцлээ.
“Монгол, ОХУ, БНХАУ гурван улсын эдийн засгийн коридор” сэдвээр илтгэл тавьсан ШУА-ийн Олон улсын харилцааны хүрээлэнгийн зөвлөх судлаач, доктор Ж.Баясахаас зарим зүйлийг тодруулав.
“Гурван улсын эдийн засгийн коридорын хүрээн дэх төсөл, хөтөлбөрүүд хэрэгжиж байгаа юу?” гэсэн асуултанд тэрээр, “Яг үнэндээ 34 төсөл, хөтөлбөрөөс цаасан дээрх нь их байгаа. Энэ талаар сая харин манай улсын Ерөнхийлөгч Бишкек хотноо болсон гурван улсын төрийн тэргүүн нарын дээд хэмжээний тавь дахь удаагийн уулзалт дээр хөндөж, манай талаас байгалийн хий дамжуулах хоолойг Монгол Улсын нутгаар тавих, Зүүн хойд Азийн эрчим хүчний нэгдсэн сүлжээг байгуулах зэрэг тодорхой саналуудыг тавилаа” гэв.
Тэрээр үргэлжлүүлэн, “Ер нь бол гурван улсын Эдийн засгийн коридорын төсөл, хөтөлбөрүүдийн ТЭЗҮ-г хийсэн, бэлэн байгаа. Төсөл, хөтөлбөрүүдийг хэрэгжүүлэхэд ОХУ-ын тал сонирхолтой байгаа. Харин БНХАУ-ын хувьд дотоод нөхцөл байдлаасаа болоод сонирхолоо хараахан илэрхийлээгүй байгаа. Байгалийн хий дамжуулах хоолойн хувьд БНХАУ-ын тал судалж үзье гэдгээ сая мэдэгдсэн.
Эрчим хүчний супер сүлжээ байгуулахын хувьд манай улсад эрчим хүчний нөөц их. Азийн орнуудаас хөрөнгө оруулж хамтран ажиллахаа БНСУ-аас эхлээд илэрхийлээд байна. Ирэх онд Улаанбаатарт Олон улсын эрчим хүчний сүлжээний төв байгуулахаар болоод байгаа. Иймэрхүү тодорхой саналууд тавигдаад байна. Тиймээс манай улсын хувьд одоо хурдны автозамаа хурдан тавьж сайжруулан төмөр замын шинэчлэлээ мөн яаралтай хийж, дэд бүтцийн ажилдаа анхаарах хэрэгтэй байна” гэлээ.
