Япон улс Монгол Улсаас хоёр салбарт ажиллах хүч авахаар болсон бөгөөд шалгалтыг аравдугаар сард явуулхаар төлөвлөжээ. Энэ талаар Япон улсын Гадаад харилцааны яамны хэвлэлийн төлөөлөгч Мицүко Шино мэдээллээ.

Монгол Улсын Гадаад харилцааны сайд Д.Цогтбаатарын урилгаар Япон улсын Гадаад хэргийн сайд Коно Таро өнгөрсөн өдрүүдэд Монгол Улсад албан ёсны айлчлал хийсэн бөгөөд айлчлалын хурлын үеэр Мицүко Шино доорх мэдээллийг өглөө.

Япон улс 14 салбарт гадаад ажиллах хүч авахаа илэрхийлээд байгаа бөгөөд өнгөрсөн дөрөвдүгээр сард Монгол Улстай ур чадвартай ажилтны Японд суух зөвшөөрлийн бичигт гарын үсэг зурсан байна.

Мицүко Шино “Японы компани, байгууллагуудаас энэ салбарт Монголоос ажиллах хүч авмаар байна гэсэн хүсэлт, саналд үндэслэн ажиллах хүч авна. Одоогийн байдлаар хоёр салбарт ажиллах хүч авмаар байна гэсэн хүсэлт ирсэн. Энэ хүсэлтийн дагуу япон хэл болон мэргэжлийн ур чадварын шалгалтыг авна. Энэ жилээс эхэлж буй энэхүү хөтөлбөрийн хүрээнд есөн улсаас ур чадвартай ажиллах хүч авна. Монгол улсын хувьд энэ оны аравдугаар сараас эхний шалгалтаа авахаар төлөвлөсөн. Хэлний шалгалт нь JLPT шалгалтын N4 буюу ахисан анхан шатнаас дээш байхаар заасан. Мөн шинэ хэлбэрийн шалгалтыг ч өгч болох юм. Ирэх оноос шалгалтын тоог нэмээд явах байх. Ажилтан авах хүсэлтэй байгаа тоо болон тэнцсэн иргэдийн тоог дүйцэх тохиолдолд улам нарийвчлаад явна” гэжээ.

Япон хэлний шалгалтын хувьд сурахаар явж буй хүмүүсийн өгдөг шалгалт учраас дүрэм түлхүү орсон байдаг. Харин ажиллаж амьдрахад шаардлагатай түвшинд ойлголцох хэмжээний чадвартай байхад үндэслэн шинэ төрлийн шалгалтыг авахаар болсон байна.