Өчигдөр буюу зургадугаар  сарын 15-ны өдөр орсон аадар борооны улмаас Говь-Алтай аймгийн Тайшир, Төв аймгийн Лүн суманд  үер бууж, үерийн улмаас автозам усанд автаж, иргэд усанд боогдсон  дуудлагаар дээрх аймгуудын Онцгой байдлын газрын алба хаагчид иргэдийн аюулгүй байдлыг хангаж ажиллажээ.

Төв аймгийн Лүн сумын нутгаар орсон түр зуурын хүчтэй борооны улмаас үер бууж,  Улаанбаатар хотоос Лүн сумын чиглэлийн автозамын зорчих хэсэг усанд автаж, Баянхангай сумын харьяат, 4 настай Ц охин сураггүй болсон дуудлагаар (2019.06.15-ны өдрийн 17.30 цаг) аймгийн Онцгой байдлын газрын даргаар ахлуулсан 20 алба хаагч, 3 автомашинтайгаар эрэн хайх ажиллагааг зохион байгуулжээ. Эрлийн баг охины цогцсыг олж, Цагдаагийн байгууллагад шилжүүлж өгсөн байна.

Түүнчлэн Улаанбаатар хотоос Төв аймгийн Лүн сумын чиглэлийн А0301 замын 110-113 дугаар км-т автозамын зорчих хэсэгт их хэмжээний ус урсаж, замын байгууламжид эвдрэл үүссэн тул Тээврийн цагдаагийн албанаас тухайн хэсэгт автомашины хөдөлгөөнийг түр хугацаагаар хязгаарлажээ.

Өчигдөр орой 21.52 цагт Төв аймгийн Лүн сумын Цагаан-Уул багийн “Зэгэс” гэдэг газар иргэн Т-ын гэр усанд автаж, 8 хүн (5 том хүн, 3 хүүхэд) усанд боогдсон тухай дуудлагаар тус аймгийн Онцгой байдлын газрын 12 алба хаагч, 2 автомашинтайгаар ажиллаж, иргэдийг аюулгүй газарт нүүлгэн шилжүүлж аюулгүй болгосон байна.

 Говь-Алтай аймгийн Тайшир суманд зургадугаар сарын 15-ны өдрийн 22.40 цагт орсон түр зуурын хүчтэй борооны улмаас малчин М, Б, Т нарын 3 гэр усанд автаж, 5 иргэн (2 том хүн, 3 хүүхэд) усанд боогдсон гэсэн дуудлагаар аймгийн Онцгой байдлын газрын 6 алба хаагч, 1 автомашинтайгаар ажиллаж, 5 иргэн, 3 гэрийг аюулгүй газарт нүүлгэн шилжүүлэн, аюулгүй болгоод байна гэж Онцгой байдлын ерөнхий газраас мэдээллээ.