Өнөөдөр Цаг уурын газраас цасан болон шороон шуургатай байх мөн Цаг агаарын аюултай үзэгдлээс сэрэмжлүүлээд байгаа билээ. Тодруулбал, Хөвсгөл-Улаанбаатар, Цэцэрлэг-Тосонцэнгэл-Нөмрөг чиглэлд Солонготын даваанд таван см орчим цас орж, хальтиргаа үүссэн байгаа тул жолооч нарыг анхаарал болгоомжтой зорчихыг Авто тээврийн үндэсний төвөөс зөвлөж байна.
Улаанбаатар-Говьсүмбэр-Дорноговь, Улаанбаатар-Дундговь-Өмнөговь чиглэлийн авто замыг тавдугаар сарын 18-ны 20.00 цагаас тавдугаар сарын 19-ний 11.00 цаг хүртэл, Улаанбаатар-Хэнтий-Дорнод-Сүхбаатар аймгийн чиглэлийн авто замыг тавдугаар сарын 19-ний 8.00 цагаас 20-ны 11.00 цаг хүртэл түр хааж, авто тээврийн хөдөлгөөнийг зогсоох тушаалыг Зам тээврийн хөгжлийн сайд гаргаад байна.
Цаг уур, орчны шинжилгээний газраас мэдээлснээр өнөөдөр нутгийн зүүн хэсгээр ахиухан хэмжээний нойтон цас орж, говь, тал хээрийн нутгаар хүчтэй цасан болон шороон шуурга шуурч, халтиргаа гулгаа үүсэж, зам, даваа, гүвээ хаагдах нөхцөл бүрдэж байгааг Автотээврийн үндэсний төвөөс онцгойлон анхааруулж байна.
