Өнгөрсөн баасан гаригт буюу энэ сарын 19-ний өдөр замын хөдөлгөөнд оролцож явсан машин дээр барилгын чулуу унасан талаар бид мэдээлж байсан.
Тэгвэл Нийслэлийн мэргэжлийн хяналтын газраас уг барилгын үйл ажиллагааг илэрсэн зөрчлийг арилтал түр зогсоожээ.
Тодруулбал, Сүхбаатар дүүргийн 1 дүгээр хороо, Гурван гал худалдааны төвийн урд, “Глобал хурд” ХХК-ний оффисын зориулалттай 16 давхар барилгын дээвэр дээр байрлах салхивчны хоолойг панеран хавтангаар таглаж дээр нь бетонон хийц тавьсан байжээ. Хүчтэй салхины улмаас панеран хавтан хийсэж дээр нь байсан бетонон хийц барилгын гадна тал руу унаж иргэн Ө-ийн автомашиныг эвдэж, биед нь бэртэл учруулсан байна.
Иймээс гомдлын дагуу Нийслэлийн Мэргэжлийн хяналтын газрын хөдөлмөрийн хяналтын улсын ахлах байцаагчийн актаар 2019 оны 4 дүгээр сарын 19-ний өдрөөс зөрчил арилгах хүртэл түр хугацаагаар үйл ажиллагааг нь зогсоох шийдвэр гаргажээ.