ИНЕГ-аас МИАТ авиа компанид ашиглаж байгаа "Boeing-737 МАХ-8" загварын агаарын хөлгийн нислэгийг өнөөдрөөс түр хугацаагаар зогсоолоо. Өчигдөр Этиопын иргэний агаарын тээврийн нисэх онгоц осолдож 157 хүний амь үрэгдсэн харамсалтай үйл явдал болоод байна. Тэгвэл энэ нь сүүлийн таван сарын дотор Boeing 737 Max 8 загварын нисэх онгоц хоёр дахь удаагаа осолдсон тохиолдол болж байна. 

Тодруулбал, Өнгөрсөн оны аравдугаар сард Lion Air компанийн ийм онгоц Индонезийн нийслэлээс хөөрөөд удалгүй осолдож 189 хүний амь үрэгдсэн юм. 

Мөн энэхүү мэдээлэлтэй холбоотойгоор Хятадын иргэний агаарын тээврийн зохицуулах газар өнөөдөр өглөө Boeing 737 Max загварын онгоцны нислэгийг 18:00 цагаас өмнө зогсоожээ. 

Үүнтэй холбогдуулан дээрх агаарын хөлгийг үйлдвэрлэгч "Boeing" компаниас зөвлөмж гарах хүртэл тус загварын онгоцыг манай улс ашиглахгүй байх шийдвэр гаргажээ.

Манай улс “Boeing 737 MAX-8” загварын орчин үеийн нэг онгоцтой бөгөөд тус онгоцыг МИАТ компани өнгөрсөн сарын 1-нд "Боинг" компаниас хүлээн авсан юм. Энэхүү загвар нь 2016 оноос үйлчилгээнд гарсан, Боинг компанийн хамгийн сүүлийн үеийн онгоц юм байна.

МИАТ ТӨХК-ийн Гүйцэтгэх захирал Д.Баттөр "Индонезид болсон ослын шалтгаан 100 хувь эцэслэж гараагүй байна. Мөн өчигдөр болсон ослын шалтгаан гарах болоогүй ч бид Boeing компанид хандан тайлбар хүсээд байна. Одоогоор хариу ирээгүй байгаа тул бид өнөөдрөөс эхлэн Boeing 737 Max 8 загварын сүүлд ирсэн онгоцны нислэгийг түр зогсоох шийдвэр гаргалаа" гэв.

Тус онгоц хэдий хүртэл нислэг үйлдэхгүй байх хугацаа нь тодорхойгүй байгаа бөгөөд Boeing компаниас ямар хариу ирэхээс хамаарах юм байна.

Дараалан гарсан Boeing 737 Max 8 загварын онгоцны осол ямар нэгэн байдлаар хүний буруутай үйл ажиллагаа бус техникийн эвдрэл гэмтэл бол Boeing компани энэ төрлийн бүх онгоцыг эргүүлэн татах аж.