Гавьяат хуульч, шүүгч асан Л.Бямбаа 2019 оны хоёрдугаар сарын 23-ны өдрийн 21:40 цагийн орчимд ШШГЕГ-ых харьяа урьдчилсан хорих 461-р хорих ангид саатуулагдан, хоригдож байх үедээ амь насаа алдсан юм. Түүнийг амиа хорлосон байж болзошгүй гэх мэдээллийг эх сурвалжууд өгч байгаа. Харин талийгаачийн ар гэрийнх нь зүгээс амиа хорлолт биш гэдгийг мэдэгдээд байгаа.

Өнөөдөр 461 дүгээр ангид саатуулагдаж байхдаа амиа алдсан Л.Бямбаагийн өмгөөлөгч Ц.Баасандорж мэдээлэл хийлээ. 

Өмгөөлөгч Ц.Баасандорж: “Талийгаачийг хорих шийдвэргүй хорисон. Талийгаачийг ар гэрийнхэн болон өмгөөлөгчтэй нь уулзуулаагүй. Баасан гаригийн өглөө АТГ-ийнхан талийгаачийг авчраад нэг өрөөнд бүтэн өдөржин суулгасан. Бидэнд байгаа мэдээллээр АТГ-ын комиссар, ахлахууд талийгаачийг дарамталсан, хүүхэдтэй нь холбоотой дарамталсан. 

Хүний эрх Монгол Улсад алга болж. АТГ гэдэг юуунд ч дийлддэггүй байгууллага гараад ирсэн байна. Энэ газар хүний эрх зөрчиж, амь насыг нь хохироочихоод уучлал гуйхын оронд “Энэ хүн чинь авилгалын хэрэгт холбогдсон” гээд байж байна.

Бид амиа хорлосон гэдэгт эргэлзэж байгаа. АТГ-ыг шалгадаг газар Монголд алга. Гэтэл энэ байгууллага хүний аминд хүрчихээд байна” гэлээ.