KFC-гийн Зайсан дахь салбараар үйлчлүүлсэн 16 хүн хоолны хордлого аван ХӨСҮТ-д эмчлүүлж байгаа талаар бид мэдээлсэн.
Өнөөдрийн байдлаар KFC сүлжээ хоолны газрын Зайсанд байрлах салбараар үйлчлүүлсний дараа хоолны хордлогын шинж тэмдэг илэрсэн гэх өгүүлэмжтэй 37 иргэн ХӨСҮТ-д эмчлүүлж байгаа ажээ. Мөн 30 гаруй хүн гадуур эмчлүүлж байгаа юм байна.
Эдгээр хүмүүс KFC-гийн “Найзууд” багцаас хордлого авсан байж болзошгүй учраас тус салбараар үйлчлүүлсэн хүмүүс эмнэлэгт хандахыг мэргэжлийн эмч зөвлөж байсан билээ.
Халдварт өвчний тандалт судалгааны албаны дарга А.Амбасэлмаагийн хэлснээр бол энэ сарын 12-нд нэг гэр бүлийн 5 хүн KFC түргэн хоолны газарт хооллоод, хоолны хордлогын шинж тэмдэг илэрсэн тул манай эмнэлэгт хандан, зөвлөгөө аваад буцсан аж.
Хордлого илэрсэн тохиолдолд өвчтөнүүдийн 3 хоногийн турш хэрэглэсэн хүнсийг судалж, шинжилдэг. Урьдчилсан байдлаар тэдгээр 20 өвчтөнөөс бүгдээс нь яг адилхан буюу шигелл гэдэг нян илрүүлсэн. Энэ нь цусан суулга үүсгэдэг нян юм.
Хоолны хордлогын халдварын үед сэжиглэж буй хүнсний бүтээгдэхүүний нян, өвчтөнөөс илэрсэн нян ижил байх ёстой. Энэ тохиолдолд тухайн түргэн хоолны газраас хордсон гэж дүгнэнэ. Одоогоор хүнсний бүтээгдэхүүний шинжилгээний хариу гараагүй байна гэж ХӨСҮТ-ээс мэдээлсэн байна.
Харин түргэн хоолны газрын ажилтнуудаас авсан шинжилгээний дүн ирэх долоо хоногт гарна.
Хордлого авсан хүмүүсийн хувьд бөөлжсөн, халуурсан шинж тэмдэгтэй байсан. Гадуур яриад байгаа шиг ухаан алдаж, унасан татсан хүн байхгүй гэжээ. Одоо эмчлүүлж байгаа хүмүүсийн хамгийн бага нь 3 настай хүүхэд. Мөн 3-14 насны арваад хүүхэд байгаа аж.
Тиймээс KFC сүлжээ хоолны газрын Зайсанд байрлах салбараар үйлчлүүлсэн, хоолны хордлогын шинж тэмдэг илэрсэн иргэдийг ирж үзүүлэхийг зөвлөж байна.
Нийслэлийн мэргэжлийн хяналтын газраас хоолны дээжээс авсан шинжилгээний хариу гараагүй байгаа бөгөөд тус сүлжээ хоолны газартай холбоотой хийгдэж буй хяналт шалгалтын явцын талаар өнөөдөр 13:30 цагаас мэдээлэл хийхээ мэдэгдээд байна.
Харин “Таван Богд фүүдс” компанийн зүгээс доорхи мэдэгдлийг гаргасан байна.
