ХVII жарны “Урвуулагч” хэмээх Шарагчин гахай жилийн сар шинийн баярт зориулсан бөхийн барилдаан өнөөдөр “Буянт-Ухаа” спорт цогцолборт боллоо.

Бөхийн барилдааны эхэнд Гандантэгчэнлин хийдийн лам нар бөхчүүд, үзэгчид, нийт ард түмэнд зориулж “Өлзий хутгийн хурын буулгагч их сан”, “Дөрвөн уулын сан”, “Хийморийн сан” тавьж, “Буян хишгийн даллага” дуудлаа. Мөн Монгол Улсын ардын жүжигчин Д.Түвшинжаргал тэргүүтэй уртын дуучид “Асрын өндөр” дууг дуулж, морин хуурчид хуурдсанаар Шарагчин гахай жилийн сар шинийн баярт зориулсан бөхийн барилдаан ёслол төгөлдөр эхэллээ.

Энэ удаагийн барилдаанд Монгол Улсын аварга Ч.Санжаадамба, Н.Батсуурь, С.Мөнхбат нар манлайлан Монгол Улсын арслан П.Бүрэнтөгс, Э.Оюунболд, Ц.Содномдорж, Р.Пүрэвдагва нарын улс, аймгийн алдар цолтой бөхчүүд зодоглосноос:

Шөвгийн дөрөвт:

1. Монгол Улсын аварга Н.Батсуурь

2. Монгол Улсын аварга С.Мөнхбат

3. Монгол Улсын арслан Р.Пүрэвдагва

4. Монгол Улсын арслан Ц.Содномдорж нар тунасан юм.

ХVII жарны "Урвуулагч" хэмээх шарагчин гахай жилийн сар шинийн баярт зориулсан хүчин 256 бөхийн барилдаанд:

Архангай аймгийн Булган сумын харьяат, “Алдар” спорт хороо, Алтан Дорнод ХХК-ийн бөх, улсын арслан Р.Пүрэвдагва түрүүлж,

Хөвсгөл аймгийн Тосонцэнгэл сумын харьяат “Хилчин” спорт хороо, “Хөвсгөлийн хүчтэн” дэвжээ, “Монос” группийн бөх, улсын арслан Ц.Содномдорж үзүүрлэлээ.

Бөхийн барилдаан дууссаны дараа Монгол Улсын Ерөнхийлөгч Х.Баттулга их шөвгийн бөхчүүдэд шагнал гардууллаа.