Хурдан морь хөлсөлж явсан 10 настай хүүхэд мориноос унаж нас барсан талаар Хүний эрхийн үндэсний комиссоос хоёр өдрийн өмнө мэдээлсэн. Үүний дараа ЗГХЭГ-ын дарга Г.Занданшатар “10 настай хүү хурдан морь хөлсөлж яваад биш, уяан дээрээ морио арчилж байгаад гэмтэл авч нас барсан хэмээн мэдэгдсэн билээ. Энэ асуудлаар УИХ-ын гишүүн, Өргөдлийн байнгын хорооны дарга М.Оюунчимэг өчигдөр Шадар сайд Ө.Энхтүвшинд шаардлага хүргүүлжээ. Уг шаардлагад, 

“Монгол Улс нь хүүхдийн эрхийг хамгаалах тухай НҮБ-ын Хүүхдийн эрхийн тухай 1989 оны Конвенц, ОУХБ-ын Хүүхдийн хөдөлмөрийн тэвчишгүй хэлбэрүүдийг устгах тухай 182 дугаар Конвенц, Насны доод хязгаарын тухай 138 дугаар Конвенцид 2002 онд тус тус нэгдэн орсон ч хүлээсэн үүргээ хангалттай биелүүлж чадахгүй байна. 
1996 оноос хойш доод тал нь 25 хүүхэд морин уралдаанаас болж амь насаа алдаж 300 гаруй хүүхэд хүнд бэртэл авч ихэнх нь хөдөлмөрийн чадваргүй болсон байна. 2016 оны 3 дугаар сарын 5-ны өдөр зохион байгуулагдсан уралдааны үеэр мориноосоо чирэгдэж хөлөө гэмтээсний улмаас хөлний 4 хуруугаа тайруулсан хүүхдэд нөхөн олговор байдлаар 450,000 төгрөг олгосон байна. 
2019 он гарсаар Сүхбаатар аймагт 10 настай унаач хүүхэд мориноос унаж амь насаа алдсан, Хэнтий аймгийн төвд 7 настай хүүхэд дээрх байдлаар хүнд гэмтэл авч одоогоор Гэмтэл согог, судлалын үндэсний төвд эмчлүүлж байгаа харамсалтай хэрэг гарлаа. 
Монгол Улсын ирээдүй болсон хүүхэд багачууд морин уралдааны үеэр эрүүл мэнд, амь насаараа хохирч байхад түүнд хяналт тавих, буруутай этгээдэд хариуцлага тооцох байдал туйлын хангалтгүй байна. Иргэний хууль, Хүүхдийн эрхийн тухай хуулиудад НҮБ-ын Хүүхдийн эрхийн тухай Конвенцийн “…18 нас хүрээгүй хүн бүрийг хүүхэд гэнэ” гэсэн зохицуулалт адилхан тусгагдсан байна.
Гэтэл Засгийн газрын 2018 оны 01 сарын 19-ний өдрийн 19 дүгээр тогтоолд дээрх Конвенц болон Монгол Улсын хууль тогтоомжийг зөрчиж, 12-оос дээш насны хүүхдээр хүйтний улиралд хурдан морь унуулахаар зохицуулсан байна. Энэ нь хүүхдийг насаар ялгаварлан гадуурхсан, хүүхдийн дээд ашиг сонирхлыг зөрчсөн үйлдэл болжээ. Иймд Засгийн газрын дээрх тогтоолыг хүчингүй болгож, буруутай этгээдэд эрүүгийн хариуцлага тооцдог болох арга хэмжээг нэн даруй авна уу” гэсэн байна.