/Reuters/ ОХУ-ын Аюулаас хамгаалах алба "Telegram" нийгмийн сүлжээг үүсгэн байгуулагч Павел Дуровыг террорист үйл ажиллагааг дэмжсэн хэрэгт буруутгаж, түүнийг олон улсын хэмжээнд эрэн сурвалжлах захирамж гаргаснаа өнөөдөр мэдэгдлээ.
Аюулаас хамгаалах албанаас мэдэгдсэнээр "Украины тусгай албад, террористууд, хэт давруу үзэлтнүүдийн байгууллагуудаас ОХУ-ын нутаг дэвсгэрт хорлон сүйтгэх ажиллагаа, террорист халдлага, олноор нь хүний амь хөнөөх гэмт хэрэг болон цахим луйврын ажиллагааг бэлтгэх, зохицуулахад ашигласан материалыг Telegram-д устгаагүй нь" дээрх шийдвэрийг гаргах үндэслэл болсон гэжээ. Энэ талаар П.Дуров эсвэл Telegram-аас одоогоор тайлбар хийгээгүй байна.
2013 онд гаргасан нууцлал бүхий Telegram мессенжер нь 1 тэрбум гаруй хэрэглэгчтэй бөгөөд Орос, Украины аль алинд өргөнөөр хэрэглэдэг.
Оросын эрх баригчид сүүлийн жилүүдэд Telegram-ын хэрэглээг хязгаарлахыг удаа дараа оролдож, оронд нь дотоодын MAX мессежийн үйлчилгээг нэвтрүүлэх ажлыг эрчимжүүлж иржээ.
ОХУ-д төрсөн ч өдгөө Арабын Нэгдсэн Эмирт Улс болон Францын иргэншилтэй П.Дуров нь Оросын хамгийн том нийгмийн сүлжээний нэг болох VKontakte-ийг үүсгэн байгуулсан бөгөөд 2014 онд Оросын эрх баригчдын шахалтаар компанийнхаа үлдсэн хувьцаагаа худалдсан юм.
Францын эрх баригчид Telegram платформыг гэмт хэргийн шинжтэй үйл ажиллагааг хангалттай хязгаарлаж чадаагүй, хууль сахиулах байгууллагуудтай хамтран ажиллаагүй гэх үндэслэлээр П.Дуровыг мөн шалгаж байгаа бөгөөд тэрбээр өөрийгөө буруугүй гэж мэдэгджээ.
