Байгаль орчин, уур амьсгалын сайд Ц.Сандаг-Очир, Дэд сайд Б.Мөнхтамир нар COP17 хурлын бүтээн байгуулалтын талбайн оройн ээлжийн ажлын явцыг шалгалаа. 

Талбайн ажилчид одоогоор хоёр ээлжээр илүү цагийн хуваарийн дагуу ажиллаж байгаа бөгөөд Үндэсний их баяр наадмын өдрүүдэд мөн бүтэн цагаар ажиллаж, төлөвлөгөөт ажлуудыг хугацаанд нь гүйцэтгэхээр төлөвлөжээ. Өнөөдрийн байдлаар гадна тохижилтын ажил 90 гаруй хувийн гүйцэтгэлтэй, дотор заслын ажил төлөвлөгөөний дагуу үргэлжилж байна. Хурлын хүрээнд барьж буй 12 түр байгууламжийг тохижилтын хамт наймдугаар сарын 6-ны дотор бүрэн дуусгаж, хүлээлгэн өгөхөөр төлөвлөжээ.

Мөн бүтээн байгуулалтын хүрээнд нийт 12 га талбайг зүлэгжүүлж, 4,800 гаруй бут сөөг тарин, гадна орчны тохижилтын ажлыг үндсэндээ бүрэн гүйцэтгээд байна.

Ажлын явцтай танилцсан Байгаль орчин, уур амьсгалын сайд Ц.Сандаг-Очир бүтээн байгуулалтын ажлыг батлагдсан хуваарийн дагуу чанар, аюулгүй ажиллагааг бүрэн ханган, хугацаанд нь дуусгаж хүлээлгэн өгөхийг холбогдох байгууллагуудад үүрэг болгосныг БОУАӨЯ мэдээлэв.