Монгол Улсын Гадаад харилцааны дэд сайд Г.Амартүвшин, ОХУ-ын Гадаад хэргийн орлогч сайд А.Ю.Руденко нар Улаанбаатар хотноо Монгол Улс, ОХУ-ын Гадаад харилцааны дэд сайдын түвшний ээлжит зөвлөлдөх уулзалтыг энэ сарын 2-нд хийв. 

Зөвлөлдөх уулзалтаар талууд хоёр улсын харилцааны хөгжлийн явцыг дүгнэж, ойрын хугацаанд хэрэгжүүлэх томоохон айлчлал, арга хэмжээ, хамтын ажиллагааны тэргүүлэх чиглэлийн талаар дэлгэрэнгүй санал солилцож, харилцан ойлголцолд хүрэв. 

Гадаад харилцааны дэд сайд Г.Амартүвшин энэ сарын 22-ны өдрөөс хүчин төгөлдөр үйлчилж эхлэх Монгол Улсын Евразийн эдийн засгийн холбоотой байгуулсан Худалдааны түр хэлэлцээр нь хоёр талын худалдаа, эдийн засаг, хөрөнгө оруулалтын салбарыг агуулгаар баяжуулах, бизнес эрхлэгчдийг хамтын ажиллагааг дэмжихээс гадна бүс нутгийн хамтын ажиллагааг шинэ шатанд гаргахад бодит хувь нэмэр оруулна гэдэгт итгэлтэй байгаагаа илэрхийлэв. 

Түүнчлэн Монгол, Оросын хамтын ажиллагааны стратегийн чухал ач холбогдолтой зам тээвэр, эрчим хүч, газрын тосны бүтээгдэхүүний салбарын хамтын ажиллагааг цаашид өргөжүүлэн хөгжүүлэх, эдгээр салбарт хамтарсан томоохон төсөл хөтөлбөрүүдийг урагшлуулах шаардлагатай байгааг онцлов. 

Зөвлөлдөх уулзалтаар олон улс, бүс нутгийн хамтын ажиллагааны хүрээнд харилцан сонирхсон асуудлаар санал солилцож, тэдгээр талбарт хамтын ажиллагаагаа улам бэхжүүлэх, харилцан ашигтай түншлэлийг гүнзгийрүүлэн нягт хамтран ажиллахад санал нэгдэв. 

Энэ удаагийн зөвлөлдөх уулзалт нь Монгол Улс, ОХУ дипломат харилцаа тогтоосны 105 жилийн ойн хүрээнд зохион байгуулж буйгаараа онцлог бөгөөд хоёр талын улс төрийн яриа хэлэлцээний итгэлцлийг нэмэгдүүлэх, хамтын ажиллагааны өнөөгийн байдлыг дүгнэх, цаашдын хамтын ажиллагааны чиглэл, зорилтыг тодорхойлоход чухал ач холбогдолтой болсныг ГХЯ мэдээлэв.