Аймаг, нийслэл, сум, дүүргийн ИТХ-ын 2026 оны нөхөн сонгуульд ашиглах сонгуулийн автоматжуулах хэрэгслийн программ хангамж, иж бүрдлийн туршилт 16 аймаг, 42 сумын 71 хэсгийн санал авах байранд энэ сарын 17-нд нэгэн зэрэг боллоо.
Уг туршилт нь санал авах байрны хяналтын камер, санал тоолох төхөөрөмж, түүний иж бүрдэл, сонгогчийн бүртгэлийн техник хэрэгслийн ажиллагаа, дүн саадгүй дамжуулж байгаа эсэхийг шалган туршиж, мэдээллийн технологийн даамал, итгэмжлэгдсэн ажилтныг дадлагажуулах зорилготой юм.
Аймаг, нийслэл, сум, дүүргийн ИТХ-ын 2026 оны нөхөн сонгууль товлон зарласан аймаг, сумдад нээлттэй болж байгаа туршилтын ажиллагаанд ажиглагчид тухайн хэсгийн хороонд хүргэгдсэн саналын хуудаст санал тэмдэглэж, санал тоолох төхөөрөмжид уншуулан, дүнг дамжуулан туршлаа.
Сонгуулийн ерөнхий хороо, Мэдээллийн технологийн төвийн албан хаагчид болон аймаг, сумдын сонгуулийн хороо, хэсгийн хороо, мэдээллийн технологийн багийн гишүүнд, даамал, "Сонгуулийн автоматжуулсан системд ашиглах программ хангамж, техник хэрэгслийн ажиллагааг шалган туршиж, баталгаажуулан гэрчилгээ олгох ажлын хэсэг"-ийн гишүүд, Улсын бүртгэлийн ерөнхий газрын итгэмжлэгдсэн ажилтнууд, үүрэн холбооны оператор, камерын хяналтын систем хариуцсан байгууллагын ажилтнууд туршилтын үйл ажиллагаанд оролцов.
Аймаг, нийслэл, сум, дүүргийн ИТХ-ын 2026 оны нөхөн сонгууль зургаадугаар сарын 21-ний ням гарагт болно.
