Өнөөдөр тохиож буй Ган, цөлжилтийн эсрэг өдрийг дэлхий нийтээрээ "Бэлчээр-хээр: үнэлье, хүндэлье, сэргээе" уриан дор тэмдэглэж байна.

Уур амьсгалын өөрчлөлт, газрын доройтол, цөлжилт, ган нь бидний өмнө тулгамдаж буй хамгийн ноцтой сорилтын нэг болсон нь зөвхөн байгаль орчны асуудал бус хүнсний аюулгүй байдал, усны нөөц, малчдын амьжиргаа, орон нутгийн хөгжил, эдийн засгийн өсөлт, ирээдүйн сайн сайхан амьдралтай шууд холбоотой.

Манай улсад бэлчээр, газар нутаг бол амьдралын үндэс, соёлын өв, эдийн засгийн тулгуур учир газрын нөөцөө хамгаалах, доройтсон газрыг нөхөн сэргээх, ус, хөрс, бэлчээрээ зохистой ашиглах, байгальд ээлтэй хөгжлийн загварыг төлөвшүүлэх нь төр, хувийн хэвшил, иргэн бүрийн хамтын хариуцлага гэдгийг БОУАӨ-ийн сайд Ц.Сандаг-Очир тодотгосон. Тэрбээр, “Бид газар нутгаа хамгаалж, нөхөн сэргээснээр хүнсний аюулгүй байдлаа бэхжүүлж, малчид, орон нутгийн иргэдийн амьжиргааг дэмжиж, хойч үедээ эрүүл, аюулгүй, тэсвэртэй орчныг өвлүүлэн үлдээх учиртай”-г онцолжээ.

Цөлжилттэй тэмцэх тухай НҮБ-ын конвенцын Талуудын 17 дугаар бага хурал буюу COP17-г наймдугаар сард Улаанбаатар хотноо зохион байгуулна. Энэ хурал нь цөлжилт, газрын доройтол, гангийн эсрэг дэлхийн хамтын ажиллагааг шинэ шатанд гаргаж, газрыг нөхөн сэргээх, бэлчээрийн тогтвортой менежмент, уур амьсгалын өөрчлөлтийг даван туулах, ногоон санхүүжилт, орон нутгийн оролцоонд суурилсан шийдлийг урагшлуулах боломж юм.

Судалгаагаар Монгол Улсын нийт нутаг дэвсгэрийн 77.8 хувь нь цөлжсөн буюу сул, дунд, хүчтэй, нэн хүчтэй өртжээ. Манай оронд ордог хур тунадасны хэмжээ хэвээр байгаа ч хуваарилалт нь өөрчлөгдсөн. Бороо нэг дор их хэмжээгээр орж үер лэнэ. Энэ нь хуурайшсан газрын хөрсийг нөхөн сэргэх боломж бүрдүүлдэггүй. Халуун өдөр, салхи шуурганы тоо олширч, сүүлийн 10 жилд түйрэнгийн давтамж 11 дахин нэмэгдсэнийг ШУА-ийн Газар зүй, геоэкологийн хүрээлэнгийн Цөлжилтийн судалгааны салбарын тэргүүлэх зэргийн эрдэмтэн, доктор А.Хауланбэк хэлж байсан юм.

Манай гараг дээр сүүлийн 20 жилд тохиосон ган гачгийн давтамж 30 хувиар өссөнөөс гадна үргэлжлэх хугацаа, давтамж, сөрөг үр дагавар нь улам бүр нэмэгдсээр байгаа ажээ.