УИХ-ын дарга, Ерөнхийлөгчийн Тамгын газрын дарга, АН-ын дарга асан З.Энхболд, Зам, тээврийн хөгжлийн сайд асан Б.Энх-Амгалан нарт холбогдох хэргийн гурав дахь удаагийн анхан шатны шүүх хурал Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд болж шүүгдэгч Б.Энх-Амгалан, З.Энхболд нарыг Эрүүгийн хуулийн 22.1.3-д зааснаар нийтийн албанд томилогдох эрхийг таван жилийн хугацаагаар хасаж, хоёр жилийн хугацаагаар хорих ялаар шийтгэсэн.

Шүүгдэгч З.Энхболд нь Ерөнхийлөгчийн тамгын газрын даргаар ажиллаж байсныг нь улс төрд нөлөө бүхий этгээд гэж шүүх үзсэн. Тийм учраас сайд асан Б.Энх-Амгаланд хууль бусаар нөлөөлөн, үргэлжилсэн үйлдлээр бусдад давуу байдал бий болгох гэмт хэргийг үйлдэхэд хатгагчаар хамтран оролцсон гэм буруутайд тооцсон.

З.Энхболдыг “үргэлжилсэн үйлдлээр хатгагч хийж” бусдад давуу байдал бий болгосон гэж шүүх үзсэн байдаг. Энэ нь удаан хугацаагаар холбоотой байж ятгах ярилцах зэргээр нөлөөлсөн гэсэн үг. Тэгвэл З.Энхболд нь сайд асан Б.Энх-Амгалантай ганц удаа ч утсаар яриагүй, мессэж бичиж байгаагүй,уулзаж ч байгаагүй гэж удаа дараа мэдэгдсэн. Тэгэхлээр “үргэлжилсэн” бүү хэл нэг удаа ч уулзаж утасдаж байгаагүй гэсэн үг. Ийм байхад яаж хатгагч болчхоод байгааг ойлгохгүй байна.

Одоо хүчин төгөлдөр үйлчилж буй Эрүүгийн хуулийн 3.4 дүгээр зүйлд гэмт хэргийн хатгагч гэдгийг тодорхойлж, хуульчилсан. Хатгагч гэдэг нь тухайлан хэн нэгэн хүнийг санаатай гэмт хэрэг үйлдэхэд зориуд хүргэсэн хүнийг хэлнэ.

Энэ нь зөвхөн гэмт хэрэг үйлдэх санааг хэн нэгэнд хэлээд өгч байгаа үйлдэл огт биш. Тухайн хүнийг гэмт хэрэг үйлдэхэд хүргэхүйц санаа бодол төрүүлэх, уриалах хүсэх, гуйх, ятгах, ямар нэг зүйл амлах, зөвлөгөө өгөх, итгүүлэх, заналхийлэх, хүч хэрэглэх, хуурч мэхлэх зэрэг аргыг хэрэглэсэн этгээдийг хэлж байгаа юм гэж хуульч Г.Эрдэнэбат манай сонинд ярилцлага өгөхдөө хэлж байсан. Хар үгээр бол тэд “Хүзүү сээрээрээ холбогдсон” нөхдүүд байсан байж л гэмт хэрэг хийхэд нь хатгагч болох юм байна. Гэтэл тэд хоорондоо огт харилцаж байгаагүй гээд мэдүүлээд байдаг. Ийм ил тод юманд яагаад шүүх илт “гөрдөж” ял өгөх болов. Ийм байдал нь шүүхийн нэр хүндэд халтай байдаг биш юм уу.

Ард түмэн шүүхдээ итгэхгүй болбол цаашид бид улс байж чадах уу. Юу шүүхэд нөлөөлөв гэдэг хар нийгэмд үүсээд удаж байна. Нөгөө “телефон жаст” гэгч нь нөлөөлөв үү. Шүүгчийн итгэл үнэмшил гэж хуульд байдаг. Шүүгч “хатгасан” л гэсэн итгэл үнэмшилтэй байсан хэрэг. Түүнийг ийн “итгэл үнэмшил”-тэй болоход хэн нөлөөлсөн бэ. Лав л хууль биш байна. Тэгэхлээр нөлөөлдөг нэг хүчин байж л таарах гээд байна гэж юм боддог хүн бүр хэлээд байгаа юм

Ж.Сандагдорж /Өдрийн сонин/