“Монгол-Японы дэвшилтэт анагаах ухааны хамтын ажиллагааны семинар 2026” үйл ажиллагаа Монгол-Японы төвд өнөөдөр боллоо. 

Монголд анх удаа зохион байгуулж буй тус семинар Монгол, Япон улсын эрүүл мэндийн салбарын хамтын ажиллагааг өргөжүүлэх, дэвшилтэт анагаах ухааны туршлага, инновац, технологи, мэдлэг солилцоог хөгжүүлэх зорилготой. Семинарт Япон улсын эмч, судлаач, мэргэжилтнүүд оролцож, дэлхий нийтийн анагаах ухаанд нэвтэрч буй сүүлийн үеийн технологи, эмчилгээний чиг хандлага, судалгааны үр дүнг танилцуулав.

Мөн эмч, эрүүл мэндийн мэргэжилтнүүд, эмнэлгийн байгууллагууд, гоо сайхны салбарын бизнес эрхлэгчид, хөрөнгө оруулагчид болон салбарын төлөөллүүдийн хамтын ажиллагааг өргөжүүлэх чухал ач холбогдолтой юм.

Японы “Кономити” компанийн хэлтсийн дарга Танигава Марико ярихдаа, "Энэ удаад Япон улсын хувийн хэвшлийн байгууллагууд сайн дурын үндсэн дээр оролцож, зөвлөгөө, хэлэлцүүлэг хийхээр хүрэлцэн ирсэн. Мөн Японы эмч нарын багийг бүрдүүлэн “Монгол, Японы дэвшилтэт анагаах ухааны хамтын ажиллагаа” сэдвийн хүрээнд зохион байгуулж байна.

Энэ нь цаашид хоёр улсын эмч, мэргэжилтнүүд болон эрүүл мэндийн байгууллагуудын хооронд мэдээлэл солилцох, шинэ технологи нэвтрүүлэх, хамтын ажиллагааг нэг алхам урагшлуулах чухал эхлэл болно гэж үзэж байна. Япон улс хүний нөөц, мэргэжлийн боловсон хүчний арвин туршлагатай учраас Монгол Улстай хувийн хэвшлийн түвшинд хамтран ажиллах сонирхолтой бий.  Энэ удаагийн айлчлал маань анхны уулзалт учраас эхний ээлжид судалгаа, танилцах чиглэлээр явагдаж байна. Цаашдаа тогтмол үйл ажиллагаа зохион байгуулж, хамтын ажиллагаагаа өргөжүүлэн хөгжүүлэх зорилготой байгаа” гэв.

Түүнчлэн мэргэжлийн эмч нар хоорондоо хэлэлцүүлэг өрнүүлж, мэдээлэл болон туршлага солилцов. Харин маргаашийн хөтөлбөрөөр Японы дэвшилтэт технологийн чиглэлд илүү төвлөрч, үүдэл эсийн эмчилгээ, гоо сайхан, хөгшрөлтийн эсрэг чиглэлийн бүтээгдэхүүн, технологиудыг танилцуулах өдөрлөг болох ажээ.