УИХ дахь МАН-ын бүлгийн өнөөдрийн хуралдаанаар УИХ-ын гишүүн М.Бадамсүрэн нарын 21 гишүүний өргөн мэдүүлсэн Хүүхдийн хөгжлийг дэмжих тухай хуулийн үзэл баримтлалтай танилцлаа.

Манай улсын 3.5 сая иргэний 39 хувийг 18хүртэлх насны хүүхэд эзэлж байна. Хүүхэд хамгааллын чиглэлээр өнөөгийн дагаж мөрдөж байгаа эрх зүйн зохицуулалтад 6-18 насны хүүхдэд зориулсан хичээлээс гадуурх хөгжлийн үйл ажиллагааг ерөнхий байдлаар тусгасан, хэрэгжилтийн механизм тодорхойгүй, санхүүжилт, хүний нөөц, орчны бодит боломж бүрэн бүрдээгүй байна.

Иймд хуулийн төсөлд хүүхдийн чөлөөт цаг, авьяас, сонирхолд тулгуурласан бодит үйлчилгээг төрөөс дэмжих, хөгжлийн үйлчилгээний бодлого бий болгох, боловсрол, соёл, спорт, хүүхэд хамгааллын салбар хоорондын уялдааг сайжруулах, орон нутгийн захиргаа, хувийн хэвшил, төрийн бус байгууллагын оролцоог нэмэгдүүлэхээр тусгасан байна.

Хуралдааны үеэр УИХ-ын гишүүд сургуулийн спорт заал, танхимыг хүүхдийн хөгжилд зориулан хүртээмжтэй ашиглах, сургуулийн орчныг хичээлээс гадуурх дугуйлан, сургалтын үйл ажиллагаанд илүү үр дүнтэй ашиглах, сургуулийг нэг ээлжээр хичээллүүлэх нөхцөлийг бүрдүүлэх, үдээс хойших цагийг хүүхдийн хөгжлийн үйл ажиллагаанд чиглүүлэх нь чухал талаар санал хэллээ. Мөн бүлгийн гишүүд зуслангийн үйл ажиллагааг нарийвчлан судлах, хуулийн төслийн үзэл баримтлалтай уялдуулах нөхцөлийг судлах хэрэгтэйг ажлын хэллээ.

Түүнчлэн хүүхэд хичээлийн бус цагаар урлаг, спорт, гадаад хэл, хувь хүний хөгжлийн чиглэлээр тасралтгүй хичээллэх боломжтой болсноор бие бялдар, авьяас чадвар, нийгмийн оролцоо, өөртөө итгэх итгэл нэмэгдэж, дотоод гадаадын уралдаан тэмцээнд амжилттай оролцох боломж бүрдэх ач холбогдолтойг гишүүд онцлов.

Хүүхдийн хөгжлийг дэмжих тухай хуулийн төслийг ийнхүү хэлэлцээд, үзэл баримтлалын хүрээнд хэлэлцэхийг дэмжлээ.