Монгол Улсын Гадаад харилцааны яам болон Монтенегро Улсын Гадаад хэргийн яам хоорондын Улс төрийн анхдугаар зөвлөлдөх уулзалт энэ сарын 7-нд цахимаар болов.
Зөвлөлдөх уулзалтаар хоёр улсын харилцаа, хамтын ажиллагааны өнөөгийн байдал болон цаашдын хамтын ажиллагааны өргөн боломжийн талаар дэлгэрэнгүй санал солилцож, худалдаа, эдийн засгийн харилцааг идэвхжүүлэх, аялал жуулчлалын салбарын хамтын ажиллагааг өргөжүүлэх, мөн шинжлэх ухаан, соёл, спортын салбарын харилцааг хөгжүүлэх боломжийг эрэлхийлэх, хувийн хэвшил хоорондын шууд хамтын ажиллагааг дэмжих, хамтарсан бизнес форум зохион байгуулах асуудлаар хэлэлцэв.
Монгол Улс, Монтенегро Улсын хооронд дипломат харилцаа тогтоосны 20 жилийн ой энэ онд тохиож буйтай холбогдуулан өндөр, дээд түвшний айлчлал хэрэгжүүлэх, хамтын ажиллагааны суурь баримт бичгүүдийг байгуулах, дипломат харилцаа тогтоосны тэмдэглэлт ойд зориулсан шуудангийн марк гаргах зэрэг арга хэмжээг энэ онд багтаан хэрэгжүүлэхээр санал солилцов.
Түүнчлэн талууд НҮБ болон олон улсын байгууллагуудын хүрээнд хамтын ажиллагаагаа үргэлжлүүлэн бэхжүүлэхээ харилцан нотолж, Цөлжилттэй тэмцэх тухай конвенцын Талуудын 17 дугаар бага хурал (COP17)-д Монтенегро Улсаас төлөөлөгч оролцуулах хүсэлтийг Монголын тал уламжлав.
Монтенегро Улс тусгаар тогтнолоо сэргээн мандуулсны 20 жилийн ой мөн энэ онд тохиож буйд баяр хүргэж, Европын Холбооноос Монтенегро Улсыг гишүүнээр элсүүлэх албан ёсны яриа хэлцлийг эхлүүлэх тухай шийдвэр гарсныг онцлон тэмдэглэв.
