БОУАӨ-ийн сайд Ц.Сандаг-Очир, Төрийн нарийн бичгийн дарга Ш.Батбаяр, ТЗУГ-ын дарга Н.Цогтбаяр нар COP17 Бага хурлыг зохион байгуулах төслийн бүтээн байгуулалтын талбайд үзлэг, шалгалт хийж ажлуудын явц, гүйцэтгэлтэй танилцлаа.

Сайд Ц.Сандаг-Очир энэ үеэр бүтээн байгуулалтыг олон улсын стандарт, аюулгүй ажиллагааны шаардлагад нийцүүлэн, чанар гүйцэтгэлд анхаарч, төлөвлөсөн хугацаанд бүрэн дуусгахыг холбогдох байгууллага, гүйцэтгэгч нарт үүрэг болгосныг БОУАӨЯ мэдээлэв.

Цөлжилттэй тэмцэх тухай НҮБ-ын конвенцын Талуудын 17 дугаар бага хурал эхлэхэд 99 хоног үлдээд байгаа. Төслийн хүрээнд хурлын үндсэн байгууламж, инженерийн дэд бүтэц, авто болон явган зам, зогсоол, түр байгууламж, холбоо мэдээлэл, хамгаалалтын системийн ажлуудыг хийж байна. Одоогоор ерөнхий төлөвлөлт, зураг төсөл боловсруулах ажлыг дуусгасан бөгөөд инженерийн шугам сүлжээ, ус хангамж, ариутгах татуурга, цахилгаан хангамжийн суурь ажлуудыг хийгээд байна. Мөн авто зам, зогсоол, явган замын ажлын 95 хувийг хийгээд байгаа ажээ.

Түүнчлэн хурлын үйл ажиллагаанд ашиглах зарим барилга байгууламжийн дотор, гадна угсралт, тоног төхөөрөмж, холбоо мэдээллийн системийн суурилуулалтын ажлыг үе шаттай хийж байна.

Энэ оны наймдугаар сард Улаанбаатарт зохион байгуулах COP17 бага хуралд 190 гаруй орны төлөөлөгч оролцох юм.