Хууль зүй, дотоод хэргийн сайд С.Амарсайхан Бүгд Найрамдах Турк Улсаас Монгол Улсад суугаа Онц бөгөөд бүрэн эрхт Элчин сайд, хатагтай Башак Гэнч Юксэлийг өчигдөр хүлээн авч уулзлаа.

ХЗДХЯ-ны мэдээлснээр, уулзалтын эхэнд сайд С.Амарсайхан Монгол Улс, Бүгд Найрамдах Турк Улс дипломат харилцаа тогтоосноос хойш өнөөг хүртэл хамтын ажиллагаа бүхий л салбарт өргөжин хөгжиж буйд талархал илэрхийлээд Монгол Улсын Засгийн газрын 2024-2028 оны үйл ажиллагааны хөтөлбөрт тусгасан хувийн эрх зүйн хууль тогтоомжийг боловсронгуй болгож, эдийн засгийг дэмжсэн эрх зүйн орчныг бий болгоход хууль тогтоомжийг нийцүүлэн боловсруулах ажлуудад анхаарал хандуулж буйг онцлов.

Мөн тэрбээр, "Монгол Улсын Засгийн газраас үндэстэн дамнасан зохион байгуулалттай гэмт хэрэг, тэр дундаа цахим гэмт хэрэг, мансууруулах болон сэтгэцэд нөлөөлөх бодистой холбоотой хэргийг илрүүлэх, таслан зогсоох, түүнээс урьдчилан сэргийлэхэд Туркийн хууль сахиулах байгууллагуудтай туршлага солилцож, хамтран ажиллах сонирхолтой байна" гэв.

Элчин сайд, хатагтай Башак Гэнч Юксэл хоёр орны найрсаг харилцаа олон жилийн туршид өргөжин хөгжсөөр ирсэнд талархаж буйгаа илэрхийлээд 2025 онд Монгол Улсын ерөнхийлөгч У.Хүрэлсүхийн Бүгд Найрамдах Турк Улсад хийсэн албан айлчлалын хүрээнд олон тооны санамж бичиг байгуулагдсаны нэг нь “Боловсролын салбарт хамтран ажиллах тухай” санамж бичиг байсан. Энэхүү санамж бичгийн хүрээнд Монгол Улсын хууль сахиулах салбарын алба хаагчид, оюутан залуусыг БНТУ-ын Үндэсний цагдаагийн академи, Жандармерийн эргийн хамгаалалтын академи, Хууль зүйн академиудад урт болон богино хугацаагаар сурган мэргэшүүлэхэд анхаарч ажиллахаа илэрхийлэв.

Бүгд Найрамдах Турк Улсын Хөгжлийн хамтын ажиллагааны байгууллага “ТИКА”-нь Хууль зүй, дотоод хэргийн яамны харьяа байгууллагуудад техникийн дэмжлэг, туслалцааг өнгөрсөн хугацаанд үзүүлж тодорхой тооны төсөл хөтөлбөрүүдийн хууль сахиулах салбарт амжилттай хэрэгжүүлж, бодит үр дүнд хүрсээр ирсэнд Сайд С.Амарсайхан талархлаа илэрхийлээд хоёр улсын хууль зүйн болон хууль сахиулах байгууллагуудын хамтын ажиллагааг өргөжүүлэн хөгжүүлэхэд Элчин сайдыг бүх талаар дэмжин хамтран ажиллахаа илэрхийлэв.

Турк Улсын Дотоод хэргийн сайд Мустафа Чифтчи Улаанбаатар хотноо энэ сарын 11-нд болох “Эдийн засаг, худалдааны Монгол, Туркийн Засгийн газрын хамтарсан хорооны ээлжит 10 дугаар хуралдаан”-ыг тэргүүлж ажиллах юм.