АН-ын ҮБХ-ны хурал Төрийн ордонд үргэлжилж байна. Өнөөдрийн хурлаар АН-ын Ерөнхий нарийн бичгийн даргыг томилох асуудлыг хэлэлцэнэ. Тодруулбал, өнгөрөгч сарын 10-нд ерөнхий нарийн бичгийн даргын үүрэг гүйцэтгэгчээр томилогдсон С.Баярцогтыг жинхлэх эсэхээр ҮБХ шийдвэрээ гаргана. Мөн тус намын дүрэмд заасны дагуу таван дэд даргыг сонгох ёстой.

Дээрх асуудлаар ҮБХ-ны гишүүдийн байр суурийг хүргэж байна.

НАМЫН ГАЛ ТОГООНД 80-ААД ОНЫХОНД ЭРХ МЭДЭЛ ӨГӨХ ЁСТОЙ

УИХ-ын гишүүн Х.Тэмүүжин:

-Намын дарга, бүлгийн даргын ажлыг хавсарч хийх нь зохимжгүй гэж ярьж байсан гишүүд одоо намын дарга асуудлаа шийдтэл бүлгийн даргын ажлаа давхар хийж байх нь зөв гэж байр сууриа өөрчилсөн байна. Миний хувьд сөрөг хүчний лидер нэг толгойтой байх нь ажлаа илүү чамбай хийхэд хэрэгтэй гэж боддог. Хоёр толгойтой болчихвол сөрөг хүчин өөрөө цалгардах эрсдэлтэй. Энэ асуудлаар цаашид хэлэлцүүлэг өрнөх байх. Тухайн үеийн улс төрийн нөхцөл байдалд АН-д аль нь зөв, буруу вэ гэдгийг нам өөрөө шийдээд явах байх.

Намын Ерөнхий нарийн бичгийн даргын асуудал дээр миний хувьд ямар нэг хувийн байр суурь байхгүй. Түүхээ харахад 70-аад оныхон нам дотроо, том улс төрдөө гол шийдвэр гаргагчид болж байна. Тиймээс намын гал тогооны ажилд 80-аад оныхондоо эрх мэдэл өгөх ёстой. Намын эв нэгдлийн тухайд манай нам дотор хүн дагасан механик бөөгнөрөл, хэдэн хүн бөөгнүүлчихвэл хүчтэй болчихно гэсэн уралдаан болоод байна. Хэний ард хэдэн хүн байна, хэн хэдийг цуглуулж чадав гэдэг уралдаан явж байна. Нам доторх ийм уралдаан намыг сүйтгэдэг, хуваагдлыг илүү гүнзгийрүүлдэг. Нэг мэдэхэд голын хоёр эрэг дээр гараад зогсчихсон байдаг. Тиймээс бусдын урсгаж байгаа голын хоёр эрэг дээр зогсохоос илүүтэй, бид өөрсдийн асаасан үзэл санааныхаа  галыг тойрч нэгдэх цаг болсон.

НАМЫН ДАРГА НЬ ЕРӨНХИЙ НАРИЙН БИЧГИЙН ДАРГАА ТОМИЛДОГ БОЛОХ ХЭРЭГТЭЙ

АН-ын дарга асан Л.Гантөмөр:

-Намын дүрмийн дагуу энэ удаад Ерөнхий нарийн бичгийн даргыг нууц санал хураалтаар сонгоно. Гэвч цаашид Улс төрийн намын тухай хуульд өөрчлөлт оруулж, намын дарга нь Ерөнхий нарийн бичгийн даргаа томилдог тогтолцоотой болох хэрэгтэй гэж харагдаж байна. Ингэж байж намын дарга өөрөө багаа бүрдүүлж, хариуцлагаа үүрч сонгуульд ордог болно. Тэгэхгүй бол хувь хүний асуудлаас болж нам дотроо талцаж, хуваагдсан мэт дүр зураг үүсдэг. Мөн нам дотор фракц үүсэх нөхцөл бүрдэж байна.

Улс төрийн нам бол үзэл санааны нэгдэл байх ёстой. Тиймээс намын дарга, Ерөнхий сайддаа бодит эрх мэдэл өгдөг эрх зүйн орчин хэрэгтэй. Ийм тогтолцоо бүрдэхгүй бол парламентын засаглал өөрөө доголдож, асуудал үүсдэг сул тал харагдаж байна.