Орон нутгийн өвөлжилтийн нөхцөл байдал, Онцгой байдлын байгууллага, анги, салбарын үйл ажиллагаатай танилцах, цаг үеийн шаардлагатай асуудлыг шийдвэрлэх, алба хаагчидтай уулзалт зохион байгуулах, шинээр байгуулагдах гал түймэр унтраах, аврах анги, аврах нэгж, салбарын бэлтгэл ажлын явцтай танилцах зорилгоор Онцгой байдлын ерөнхий газрын дарга, хошууч  генерал Т.Бадрал орон нутагт ажиллаж байна.

Тэрээр энэ сарын 15-16-ны өдрүүдэд Өвөрхангай, Баянхонгор аймгуудад ажиллаж, өвөлжилтийн нөхцөл байдалтай танилцлаа.

Өвөрхангай аймгийн хувьд энэ жил бэлчээрийн даац олон дахин хэтэрсэн, ургамлын гарц тааруу  байгаа ч нийт нутгаар цасан бүрхүүл багатай өвөлжилт хүндэрсэн сумд байхгүй. Засгийн газрын 218 дугаар тогтоолыг хэрэгжүүлэх, өвөлжилт, хаваржилтын бэлтгэл ажлыг хангах арга хэмжээний хүрээнд сумдын нөөцөд 880 тн өвс, 557 тн үйлдвэрийн тэжээл бэлтгэж, тэжээлийн аюулгүй нөөцийг 100 хувь бүрдүүлжээ.

Харин Баянхонгор аймгийн хувьд Засгийн газрын 218 дугаар тогтоолыг хэрэгжүүлэх ажлын хүрээнд өвөлжилт, хаваржилтийг хангах нарийвчилсан төлөвлөгөө гаргаж, сумдын нөөцөд 662,3 тн өвс тэжээл, аймгийн аюулгүй нөөцөд 181,6 тн өвс тэжээлийг бэлтгэсэн. Бэлчээрийн өвс тэжээлийн хүрэлцээ хангамж муу байгаагаас өвс, тэжээлийн 60 хувь, сум, аймгийн нөөцийн өвс тэжээлийн 25 хувийг зарцуулаад байна. Нийт нутгаар цасан бүрхүүл тогтоогүй. Цас орвол өвөлжилт хаваржилт хүндрэх төлөвтэй байгааг танилцууллаа.

Мөн аймгийн Онцгой байдлын газрын үйл ажиллагаатай танилцан, алба хаагчидтай уулзалт хийсэн юм.

Уулзалтын  үеэр Онцгой байдлын байгууллагаас авч хэрэгжүүлж буй бодлого үйл ажиллагааг танилцуулахаас гадна алба хаагчдын ажил үүргээ гүйцэтгэх мэргэжлийн ур чадвар, нийгмийн баталгааг хангах хууль, эрхзүйн томоохон өөрчлөлт шинэчлэлтүүдийн талаар мэдээлэл өгч, үүрэг чиглэл өгөв.