Монгол Улсын Шадар сайдын эрхлэх асуудлын хүрээний байгууллагуудын Нээлттэй хаалганы өдөрлөг өнөөдөр төв талбайд боллоо.
Шадар сайд Н.Номтойбаяр энэ үеэр хэлэхдээ, “Онцгой байдлын байгууллагын үйл ажиллагааг хэрэгжүүлэх явцад иргэд зохих мэдлэгтэй, оролцоотой байх нь нэн чухал бөгөөд цаашид албаны техник хэрэгслийн хангамжийг нэмэгдүүлнэ. Үүний зэрэгцээ стандарттай холбоотой олон нийтийн ойлголтыг нэмэгдүүлэх, шинэчлэн тогтоох цогц ажлыг хэрэгжүүлнэ. Үүнд, авто зам, хүнс, эм, эмнэлгийн хэрэгсэл зэрэг иргэдийн аюулгүй байдалтай шууд холбоотой салбаруудад тавих хяналт шалгалтыг сайжруулж, стандартын шаардлагыг хангах тогтолцоог бэхжүүлнэ. Түүнчлэн бүсчилсэн хөгжлийн бодлогын хүрээнд хүнд болон хөнгөн үйлдвэрийн салбаруудын уялдааг хангаж, хөгжлийн цогц бодлогыг хэрэгжүүлэх, хот, хөдөөгийн хөгжлийн тэнцвэрт байдлыг хангах чиглэлд анхаарна. Ялангуяа, Улаанбаатар хотын гэр хорооллын бүсэд эдийн засгийн чиг баримжаатай цогц хөгжлийн хөтөлбөрийг боловсруулахад анхаарч ажиллаж байна” гэлээ.
Өдөрлөгөөр Онцгой байдлын ерөнхий газар, “Бүсчилсэн хөгжлийн үндэсний хүрээлэн” УТҮГ, Стандарт, хэмжил зүйн газар, Хүнсний аюулгүй байдлын үндэсний лавлагаа лаборатори, Үндэсний итгэмжлэлийн төв, Замын-Үүд чөлөөт бүс, Хөшигийн хөндийн эдийн засгийн чөлөөт бүс, Цагааннуур чөлөөт бүс, Алтанбулаг чөлөөт бүс зэрэг байгууллагууд иргэд, олон нийтэд үйл ажиллагаагаа танилцуулсан юм.
Гамшиг судлалын үндэсний хүрээлэнгийн захирал, бригадын генерал Л.Болдбаатар байгууллагынхаа тухайд, ”Манай хүрээлэнгийн үндсэн үүрэг бол гамшгаас хамгаалах, урьдчилан сэргийлэх чиглэлээр судалгаа шинжилгээ хийх, эрдэм шинжилгээний бүтээл туурвих, ном товхимол гаргах, мөн иргэдийн аюулгүй байдлыг хангах хүрээнд нэгдсэн лаборатори ажиллуулж, барилгын материалын галд тэсвэртэй байдлыг шалгах зэрэг үйл ажиллагаа явуулдаг. Сүүлийн жилүүдэд иргэдийн санамсар болгоомжгүй байдлаас болон галд тэсвэргүй материалаар орон сууцаа барьснаас болж галд өртөмтгий байдал нэмэгдсээр байна. Тиймээс манай иргэд гэр орон, нийтийн орон сууц барихдаа галд тэсвэртэй материалыг сонгодог байх хэрэгтэй. Энэ чиглэлээр бид ААН-үүдтэй хамтарч ажиллан, барилгын материалын тэсвэржилтэд дүгнэлт гаргадаг. Зах зээл дээрх үнийн ялгаатай байдлаас болж аль хямдыг нь сонгож байгаа тул санхүү, эдийн засгийн хувьд бололцооны, чанартай материалыг иргэд, олон нийтэд хүргэхийн төлөө ажиллаж байна” гэв.
Ахлах сургагч, дэслэгч Б.Баярдаваа, “Үндэсний аврах бригадын Эрэлч нохой сургалтын алба нь 21 аймагт албаны нохой сургаж бэлдэх үндсэн чиг үүрэгтэй ажилладаг. Манай байгууллага эрэн хайх, аврах, уснаас эрэн хайх, нурангинаас эрэн хайх, ой, хээр, говийн бүсэд эрэн хайх гэсэн бүсчлэлээр сургалт явуулдаг. Би онцгой байдлын албанд 9 дэх жилдээ ажиллаж байна. Манай нохойг Балу гэдэг. Балу нохой маань 2021 онд анх сургалтад хамрагдсан. Түүнээс хойш олон улсын нэг удаагийн, дотоодын 19 удаагийн дуудлагаар үүрэг гүйцэтгэсэн. Үүрэг гүйцэтгэж эхэлснээсээ хойш 12 хүний амийг аварч, 21 хүний байршлыг олж илрүүлсэн" гэсэн юм. Энэ үеэр Шадар сайд Н.Номтойбаяр харьяа байгууллагуудын үйл ажиллагаатай танилцаж, салбарын ажилтан, албан хаагч нартай болон аж ахуйн нэгжүүд, хөрөнгө оруулагч нарын төлөөлөлтэй уулзаж санал солилцлоо.
