УИХ-ын Байгаль орчин, хүнс, хөдөө аж ахуйн байнгын хорооноос зохион байгуулсан Ойн тухай хуулийн шинэчилсэн найруулгын төслийн талаарх цуврал хэлэлцүүлэг Төрийн ордонд өнөөдөр боллоо.
Эл хэлэлцүүлгийг тус байнгын хороо болон УИХ-ын даргын 523 дугаар захирамжийн хүрээнд байгуулсан Байгаль орчин, ногоон хөгжлийн асуудлаар санал дүгнэлт гаргах, холбогдох хууль тогтоомжийн төсөл боловсруулах үүрэг бүхий ажлын хэсгээс цувралаар явуулж буй. Тус хэлэлцүүлгийн эхнийх өнгөрсөн сарын 30-нд болж, ойн салбарын эрдэмтэн судлаачид, ойн чиглэлээр тогтвортой судалгаа хийж байгаа мэргэжлийн байгууллагууд, мод үржүүлэг, агро ой эрхлэгчдийг хамруулсан. Өнөөдрийн хэлэлцүүлгийн хувьд тус чиглэлээр үйл ажиллагаа явуулдаг аж ахуйн нэгж, бизнес эрхлэгчдийг оролцуулж, тэдний санал бодлыг сонслоо.
УИХ-ын гишүүн, ажлын хэсгийн ахлагч Б.Бат-Эрдэнэ, Ойн тухай хуулийн шинэчилсэн найруулгын төсөл нь 12 бүлэг, 59 зүйлтэй. Үзэл баримтлалын хувьд ойг экосистем хэмээн тодорхойлж, эдийн засгийн эргэлтийг нэмэгдүүлэх, орон нутгийн иргэдийн амьжиргааг дээшлүүлэхэд чиглэсэн заалтуудыг тусгаснаараа шинэлэг болохыг онцлов. УИХ-ын гишүүн А.Ундраа мөн үеэр хэлэхдээ, “Ойг эдийн засгийн эргэлтэд оруулах, хамгаалах, нөхөн сэргээх тухай асуудал бол үндэсний стратегийн чухал ач холбогдолтой чиглэл. Тухайлбал, Хөвсгөл, Хэнтий зэрэг аймгийн алсалсан сумдын иргэд ойнхоо эзэн болох, амьжиргаагаа авч явах тал дээр төрийн бодлогоор тэднийг дэмжих ёстой. Үүний зэрэгцээ техник технологийн дэвшлийг ашиглан, иргэдэд мэдлэг олгох, чадавхжуулах, нөхөрлөл хоршоодын дэмжихэд хуулийн төсөл чиглэх шаардлагатай”-г тэмдэглэлээ. Монголын ойн тогтвортой өв ТББ-ын тэргүүн З.Болдбаатарын хувьд “Ойн салбар бол нөхөн төлждөг салбар. Тиймээс ойгоо эдийн засгийн эргэлтэд зөв зохистой оруулбал улсын эдийн засагт маш том нөлөө үзүүлнэ. Гол нь хуулиа зөв гаргах хэрэгтэй” гэсэн байр суурьтай байгаагаа хэллээ.
Одоогийн хүчин төгөлдөр мөрдөж буй Ойн тухай хуулийн зорилт нь Монгол Улсын ойг хамгаалах, нөхөн сэргээх, үржүүлэх, эзэмших, ашиглах, ой, хээрийн түймрээс урьдчилан сэргийлэхтэй холбогдсон харилцааг зохицуулж байгаа аж. Шинэчилсэн найруулгын төсөл нь ойн нөөцийг хамгаалах, нөхөн сэргээх, тогтвортой ашиглахын зэрэгцээ экосистемийн тэнцвэр, биологийн олон янз байдал, эдийн засгийн үр өгөөж, орон нутгийн оролцоог уялдуулахад чиглэсэн байна.
Хүчин төгөлдөр мөрдөж буй хууль ойн санг хамгаалалтын болон ашиглалтын бүсийн ой гэж ангилдаг байсан бол эл төсөлд "тусгай зориулалтын ой" гэсэн гурав дахь ангиллыг нэмж, генетик нөөц, судалгаа, сургалт, хот суурин газрын ногоон бүс буюу ой, түүх-соёлын ач холбогдолтой ойг тусгай дэглэмтэй болгон тусгажээ.
Түүнчлэн төсөлд улсын, аймаг/нийслэл, сум, эзэмшлийн ой, гэрээт менежмент гэсэн бүх түвшинд төлөвлөгөөтэй, уялдаатай, тайлагналтай байхаар системчилсэн байна. Зөвшөөрөл, гэрээ, ангилал, ашиглалт, нөхөн сэргээлт, нүүрстөрөгч, зөрчил, тайлан бүгдийг багтаасан олон нийтэд ил тод, цахим нэгдсэн систем болгон хөгжүүлнэ. Мөн экосистемийн үйлчилгээ, ойн эдийн засаг, био-эдийн засаг, нүүрстөрөгчийн шингээлт, нүүрстөрөгчийн нэгж, нүүрстөрөгчийн төсөл гэх мэт орчин үеийн зах зээл, уур амьсгалын бодлоготой уялдсан өөрчлөлтийг тусгажээ.
